سمندری طوفان کراچی سے 340 کلو میٹر کے فاصلے پر

سمندری طوفان بائپر جوئے کا کراچی سے فاصلہ اب کم ہو کر 340 کلو میٹر رہ گیا ۔ محکمہ موسمیات نے سمندری طوفان پر  19واں الرٹ جاری کر دیا ہے  جس کے مطابق شدید نوعیت کے سمندری طوفان بائپر جوئے کی شمال اور  شمال مشرق کی جانب پیش قدمی جاری رہی۔  محکمہ موسمیات کا کہنا ہے کہ سمندری طوفان کراچی کے جنوب سے 340کلو میٹر، ٹھٹھہ کے جنوب سے طوفان 355 کلومیٹر اور کیٹی بندر سے 275 کلومیٹر دور ہے۔ طوفان کے مرکز میں ہوائیں 180 کلو میٹر فی گھنٹہ کی رفتار سے چل رہی ہیں جبکہ طوفان کے مرکز اور اطراف میں 30 فٹ بلند لہریں اٹھ رہی ہیں۔ محکمہ موسمیات نے پیشگوئی کر رکھی ہے کہ 14 جون تک سمندری طوفان شمال مشرق کی جانب بڑھے گا اور 15جون کی دوپہر کو طوفان جنوب مشرقی سندھ میں کیٹی بند اور بھارتی گجرات سے ٹکرائے گا۔