بھارت کا آئی سی سی پر اثررسوخ زیادہ ہے

پاکستان کرکٹ بورڈ کے چیئرمین رمیز راجا نے خلیجی اخبار کو انٹرویو دیتے ہوئے کہا ہے کہ انٹرنیشنل کرکٹ کونسل کی زیادہ تر کمائی کا ذریعہ بھارت ہے اور یہی وجہ ہے کہ بھارت کے معاملے پر آئی سی سی کا رویہ ضرورت سے زیدہ محتاط ہوتا۔ بدقسمتی سے نتیجہ مصلحت پسندی کی صورت میں نکلتا ہے۔ جب تک مکمل کرکٹ کیمونٹی مل کر کام نہیں کرے گی یہ صورتحال تبدیل نہیں ہوگی۔ رمیز راجا نے آئی سی سی سے مطالبہ کیا ہے کہ وہ پاک بھارت کرکٹ سیریز کرانے میں اپنا کردار ادا کرے۔ رمیز کے مطابق کرکٹ تماشائی دونوں ملکوں کے درمیان زیادہ سے زیادہ کرکٹ دیکھنے کے خواہش مند ہیں۔ پاکستان کو بھارت یا پھر بھارت کو پاکستان میں کھیلنے پر کوئی جواز یا بہانہ پیش نہیں کرنا چاہیے۔ آئی سی سی کی ذمے داری ہے کہ وہ اس معاملے پر خاموش تماشائی بننے کے بعد اپنا کردار آگے بڑھ کر ادا کرے۔

یاد رہے کہ بھارت نے پاکستان میں ایشیا کپ نہ کھیلنے کی جانب اشارہ دیا ہے جس پر چیئرمین کرکٹ بورڈ رمیز راجا نے بھی بھارت میں ہونے والے عالمی کپ کے بائی کاٹ کی دھمکی دے رکھی ہے۔