پی ایس ایل 7: ” ہمارے ہیروز”  کے لیے پرستار کریں گے نامزدگیاں

پاکستان کرکٹ بورڈ کے مطابق پی ایس ایل کے 7 ویں سیزن کے لیے اب ” ہمارے ہیروز” کی نامزدگیوں کا اختیار کرکٹ پرستاروں کے پاس ہوگا۔ پی ایس ایل 7 کا رنگا رنگ میلہ 27 جنوری سے شروع ہوگا۔ کرکٹ دیوانے کسی بھی پسندیدہ اور غیرمعمولی خدمات انجام دینے والی شخصیت کے کوائف سے متعلق آن لائن فارم 23 جنوری تک جمع کراسکتے ہیں جو کہ پی ایس ایل کی آفیشل ویب سائٹ پر موجود ہے۔ اس بار بھی مجموعی طور پر 34 شخصیات کو ” ہمارے ہیروز” کے ایوارڈز دیے جائیں گے۔

کرکٹ پرستاروں کی طرف سے جمع کرائے گئے امیدواروں کے ناموں کی حتمی منظوری پی سی بی گورننگ بورڈ دے گا۔ جنہیں میچ کے دوران اس ” ہمارے ہیروز” کے ایوارڈز سے نوازا جائے گا۔ پرستار کھیل، تعلیم ، صحت، آرٹ، سماجی کام، ٹیکنالوجی اور ثقافت سے تعلق رکھنے والی شخصیات کو نامزد کرسکتے ہیں۔ چاہیں تو ایک سے زائد کیٹگیریز میں بھی نامزدکیا جاسکتا ہے۔