سوئٹزرلینڈ کے کرانس مونٹانا میں بار دھماکہ، متعدد ہلاکتیں اور زخمی

سوئٹزرلینڈ کے مشہور اسکی ریزورٹ شہر کرانس مونٹانا میں ایک بار میں ہونے والے زور دار دھماکے نے تہلکہ مچا دیا ہے، جس کے نتیجے میں متعدد افراد ہلاک اور کئی زخمی ہو گئے ہیں۔

پولیس کے مطابق یہ دھماکہ جمعرات کی علی الصبح تقریباً ڈیڑھ بجے مقامی وقت کے مطابق Le Constellation نامی مشہور بار میں ہوا، جہاں نئے سال کی تقریبات جاری تھیں اور بڑی تعداد میں سیاح موجود تھے۔کینٹن والیس کی پولیس کے ترجمان گیٹن لاتھین نے بتایا کہ دھماکے کی وجوہات ابھی تک معلوم نہیں ہو سکیں۔ واقعے کے فوری بعد بار میں آگ بھڑک اٹھی، اور امدادی ٹیمیں اور فائر بریگیڈ موقع پر پہنچ گئی ہیں۔ پولیس کا کہنا ہے کہ ریسکیو اور تفتیشی کارروائیاں جاری ہیں اور واقعے کی مکمل تفصیلات بعد میں جاری کی جائیں گی۔ سوئس میڈیا میں شائع تصاویر میں عمارت شعلوں میں لپٹی نظر آ رہی ہے، جبکہ قریبی علاقوں میں ایمرجنسی سروسز کی گاڑیاں اور عملہ موجود ہیں۔ پولیس نے متاثرہ علاقے کو مکمل طور پر بند کر دیا ہے اور کرانس مونٹانا پر نو فلائی زون نافذ کر دیا گیا ہے۔ ابتدائی اطلاعات کے مطابق دھماکے کے وقت بار میں 100 سے زائد افراد موجود تھے، جو نئے سال کے جشن میں شریک تھے۔ ترجمان کے مطابق متعدد افراد زخمی ہیں اور کئی ہلاک ہو چکے ہیں، جبکہ دھماکے کی اصل وجہ تاحال سامنے نہیں آ سکی۔ امدادی ٹیمیں اور فائر فائٹرز ہر ممکن کارروائی کر رہے ہیں تاکہ زخمیوں کو فوری طبی امداد فراہم کی جا سکے اور آگ پر قابو پایا جا سکے۔یہ واقعہ نہ صرف سوئٹزرلینڈ بلکہ عالمی سطح پر بھی سنسنی پیدا کر رہا ہے، اور حکومت نے شہریوں سے محتاط رہنے کی ہدایت جاری کر دی ہے۔