کراچی سمیت ملک بھر میں شدید سردی کی پیش گوئی

محکمہ موسمیات نے خبردار کیا ہے کہ کراچی سمیت ملک کے مختلف علاقوں میں شدید سردی کی لہر متوقع ہے۔ کراچی کے شہریوں کے لیے اہم اطلاع یہ ہے کہ آئندہ چند دنوں میں درجہ حرارت میں مزید کمی آ سکتی ہے، لہٰذا گرم کپڑوں اور احتیاطی تدابیر کی ضرورت ہوگی۔ آج ملک کے بیشتر حصوں میں موسم سرد اور خشک رہے گا۔ پہاڑی علاقوں میں صبح اور رات کے اوقات خاص طور پر شدید سرد رہنے کا امکان ہے۔ پنجاب، بالائی سندھ اور خیبرپختونخوا کے میدانی علاقوں میں دھند کی موجودگی رہیگی، جبکہ کشمیر اور گلگت بلتستان میں موسم انتہائی سرد اور آسمان جزوی ابر آلود رہنے کا امکان ہے۔اسلام آباد، مری اور گلیات میں موسم خشک اور سخت سرد رہے گا۔ لاہور، سیالکوٹ، نارووال، جہلم، گوجرانوالہ، گجرات، ساہیوال، خانیوال، فیصل آباد، شیخوپورہ، اوکاڑہ، قصور، ملتان، بہاولپور، جھنگ، شورکوٹ، کوٹ ادو، بہاولنگر، خان پور اور رحیم یار خان میں دھند چھائی رہنے کا امکان ہے۔

این ڈی ایم اے نے آئندہ تین دنوں کے لیے ملک بھر میں شدید دھند کا الرٹ جاری کر دیا ہے۔ سندھ، خیبرپختونخوا اور بلوچستان کے بیشتر اضلاع میں موسم سرد اور خشک رہے گا۔ سکھر، روہڑی، شکارپور، کشمور، شہید بینظیرآباد، موہنجوداڑو، پشاور، مردان، نوشہرہ، چارسدہ، صوابی، بنوں اور ڈی آئی خان میں بھی دھند چھائی رہنے کی توقع ہے۔