پاکستان سے جنگ نہیں ہونی چاہئے، امریکی صدر

امریکی صدر ڈونلڈ ٹرمپ نے انکشاف کیا ہے کہ انہوں نے بھارتی وزیرِاعظم نریندر مودی سے دوٹوک الفاظ میں کہا کہ پاکستان کے ساتھ جنگ کسی صورت نہیں ہونی چاہیے۔اوول آفس میں دیوالی کی تقریب کے دوران گفتگو کرتے ہوئے ٹرمپ نے بتایا کہ ان کی مودی سے ٹیلیفونک بات چیت میں تجارت سمیت کئی اہم امور زیرِ بحث آئے۔ان کا کہنا تھا کہ وہ تنازعات کا حل جنگ میں نہیں بلکہ تجارت اور باہمی مفاہمت میں ڈھونڈتے ہیں, یہی سوچ لے کر انہوں نے مودی کو صاف الفاظ میں جنگ سے باز رہنے کا مشورہ دیا۔ٹرمپ نے ایک اور اہم بیان میں دعویٰ کیا کہ صرف تجارت کے ذریعے انہوں نے دنیا میں آٹھ ممکنہ جنگیں رکوا دیں، جن میں پاکستان اور بھارت کے مابین کشیدگی بھی شامل تھی۔انہوں نے بتایا کہ پاک بھارت تناؤ کے دوران سات لڑاکا طیارے مار گرائے گئے تھے، فضا میں جنگ کے آثار نمایاں تھے، مگر اسی نازک وقت میں انہوں نے دونوں ممالک کی قیادت سے رابطہ کرکے متنبہ کیا کہ اگر جنگ ہوئی تو امریکا تجارتی تعلقات ختم کردے گا۔ان کے بقول، اس سخت پیغام کے صرف 24 گھنٹوں کے اندر دونوں ممالک نے واضح جواب بھیج دیا کہ وہ جنگ نہیں چاہتے۔یہ امر بھی قابلِ ذکر ہے کہ صدر ٹرمپ اس سے قبل بھی متعدد مواقع پر پاک بھارت جنگ ٹالنے کا کریڈٹ خود کو دیتے رہے ہیں۔