دورہ جاری رہے گا ، سری لنکن کرکٹ بورڈ

سری لنکن کرکٹ بورڈ نے پاکستان کا دورہ جاری رکھنے کی باضابطہ تصدیق کرتے ہوئے ایک اہم اعلان کیا ہے۔ بورڈ کے ترجمان کے مطابق اگر کسی سری لنکن کھلاڑی نے بورڈ کی ہدایت کے باوجود وطن واپس جانے پر اصرار کیا تو اس کی جگہ فوری طور پر متبادل کھلاڑی پاکستان بھیجا جائے گا تاکہ سیریز کا شیڈول متاثر نہ ہو۔ سری لنکن کھلاڑیوں کو آج صبح وطن واپسی کی درخواست پر یقین دہانی کرائی گئی کہ پاکستان کرکٹ بورڈ ان کے تمام تحفظات کا ازالہ کرے گا اور ہر ممکن طور پر انہیں محفوظ ماحول فراہم کیا جائے گا۔ ترجمان نے واضح کیا کہ ٹیم کے ہر رکن کی سلامتی اور بہبود بورڈ کی اولین ترجیح ہے۔ پاکستان کرکٹ بورڈ کے چیئرمین محسن نقوی نے بھی کھلاڑیوں کے تحفظ کو یقینی بنانے کا وعدہ کیا ہے۔ انہوں نے کہا کہ پاکستان میں موجود سری لنکن ٹیم کو اعلیٰ سطح کی سیکیورٹی فراہم کی جارہی ہے۔ ایکس (سابق ٹوئٹر) پر اپنے پیغام میں محسن نقوی نے سری لنکن بورڈ کے فیصلے کا شکریہ ادا کرتے ہوئے کہا کہ یہ کھیل کے جذبے اور دونوں ممالک کے درمیان دوستی کی روشن مثال ہے۔

Grateful to the Sri Lankan team for their decision to continue the Pakistan tour 🇵🇰🇱🇰.
The spirit of sportsmanship and solidarity shines bright.
The ODI matches between Pakistan and Sri Lanka will be played on 14th and 16th November in Rawalpindi.#PakistanCricket #PAKvSL

— Mohsin Naqvi (@MohsinnaqviC42) November 12, 2025

دوسری جانب پاکستان اور سری لنکا کے ون ڈے سیریز کے شیڈول میں معمولی تبدیلی کر دی گئی ہے۔ دونوں ٹیموں کے درمیان دوسرا ون ڈے میچ اب 14 نومبر کو راولپنڈی میں کھیلا جائے گا، جو پہلے 13 نومبر کو ہونا تھا۔ اسی طرح تیسرا ون ڈے میچ 16 نومبر کو ہوگا، جسے ابتدائی طور پر 15 نومبر کے لیے مقرر کیا گیا تھا۔ پی سی بی کے مطابق دوسرے ون ڈے کے لیے خریدے گئے ٹکٹ 14 نومبر کو قابلِ استعمال ہوں گے، جبکہ 15 نومبر کے لیے جاری ٹکٹ اب 16 نومبر کو استعمال کیے جا سکیں گے۔وزیراعظم، محسن نقوی، مریم نواز اور گورنرز پنجاب و سندھ نے قومی ٹیم کو سری لنکا کے خلاف ون ڈے سیریز میں شاندار کامیابی پر مبارکباد دی۔ یوں، سری لنکن ٹیم کا پاکستان میں کھیل جاری رکھنے کا فیصلہ نہ صرف کرکٹ کے لیے خوش آئند ہے بلکہ دونوں ممالک کے تعلقات اور کھیل کے عالمی تاثر کے لیے بھی ایک مثبت پیغام ہے۔