نیٹ فلکس کی عالمی شہرت یافتہ سیریز ’اسکوئڈ گیم‘ کے تیسرے اور آخری سیزن کا دل دہلا دینے والا ٹریلر جاری کر دیا گیا ہے، جس نے مداحوں کے دلوں کی دھڑکنیں تیز کر دی ہیں۔ سنسنی، سازش اور قربانیوں کی اس داستاں کا اختتام اب قریب ہے۔ نئی قسطوں کا آغاز وہیں سے ہو گا جہاں سیزن 2 ختم ہوا تھا۔ مرکزی کردار گی ہُن (اداکار لی جنگ جے) اب بھی اس خفیہ اور قاتل کھیل کے پیچھے چھپی طاقتوں کے خلاف تنہا نبرد آزما ہے۔ مگر اب وہ سب کچھ تقریباً گنوا چکا ہے, رشتے، سکون، اور شاید خود پر اعتماد بھی۔ ہدایتکار ہوانگ ڈونگ ہیوک نے اس بار ایک ایسا گی ہُن دکھایا ہے جو پچھتاوے، تنہائی اور جذبات کے بوجھ تلے دبا ہے، لیکن پھر بھی امید اور انسانیت کے علم کو تھامے آگے بڑھنے کی کوشش کرتا ہے۔ ٹریلر میں خوفناک "ریڈ لائٹ، گرین لائٹ” گیم کی قاتل گڑیا ینگ ہی ایک بار پھر دہشت کی علامت بن کر لوٹ آئی ہے۔ اس بار کھیل کے اصول مزید بھیانک اور نتائج اور بھی خطرناک ہوں گے۔ گلابی ماسک پہنے گارڈز بدستور بے رحم ہیں، اور فرنٹ مین دوبارہ اپنی خوفناک موجودگی کے ساتھ سامنے آیا ہے۔ ایک منظر میں وہ گی ہُن سے پوچھتا ہے:
"کیا تمہیں اب بھی انسانوں پر یقین ہے؟” اداکار لی بیونگ ہن نے مداحوں کو یقین دلایا ہے کہ اس سیزن میں سنسنی، ڈرامہ اور جذبات کا وہ طوفان ہو گا جو مداحوں کو آخری لمحے تک جکڑے رکھے گا۔ واضح رہے کہ ‘اسکوئڈ گیم’ کا فائنل سیزن 27 جون کو نیٹ فلکس پر ریلیز کیا جا رہا ہے۔
‘اسکوئڈ گیم’ کا آخری کھیل شروع — خونی کھیل کے سائے میں واپسی
Discussion about this post