دہلی ہائی کورٹ نے آئی آر ایس افسر سمیر وانکھیڑے کو قانونی اجازت دے دی کہ وہ بالی ووڈ اسٹار شاہ رخ خان کے بیٹے آریان خان کی ویب سیریز "دی بیڈز آف بالی ووڈ” کے خلاف مقدمہ ممبئی میں دائر کریں۔ عدالت نے واضح کیا کہ دہلی ہائی کورٹ کے پاس اس معاملے کی علاقائی حدود میں سماعت کا اختیار نہیں ہے۔ سمیر وانکھیڑے کو اب ممبئی کی متعلقہ عدالت میں اپنے قانونی حقوق کے تحفظ کے لیے درخواست دائر کرنے کی آزادی حاصل ہو گئی ہے۔ جسٹس وکاس مہاجن نے حکم دیا کہ دونوں فریقین 12 فروری کو ممبئی کی عدالت میں ذاتی طور پر پیش ہوں۔ ابتدائی درخواست میں وانکھیڑے نے مؤقف اختیار کیا کہ ویب سیریز کی پہلی قسط میں دکھایا گیا ایک کردار ان کی شخصیت سے مشابہت رکھتا ہے اور یہ کردار ان کی عزت و وقار کو نقصان پہنچانے والا ہے۔
وانکھیڑے کے مطابق کردار کا انداز، شکل و صورت، رویہ اور باڈی لینگویج ان سے واضح مماثلت رکھتی ہے اور یہ مماثلت میڈیا رپورٹس میں بھی اجاگر کی گئی۔ انہوں نے عدالت سے متنازع مناظر کو ہٹانے یا اس پر پابندی عائد کرنے کی درخواست کی تاکہ ان کی پیشہ ورانہ ساکھ کو تحفظ فراہم کیا جا سکے۔ عدالت نے مقدمہ ممبئی منتقل کرنے کی وجہ یہ بتائی کہ سمیر وانکھیڑے ممبئی میں مقیم ہیں اور سیریز کی پروڈیوسر کمپنی ریڈ چِلّیز انٹرٹینمنٹ کا رجسٹرڈ دفتر بھی اسی شہر میں موجود ہے۔ یہ ویب سیریز شاہ رخ خان کی پروڈکشن کمپنی نے تیار کی، اور ریلیز کے بعد اس نے قانونی اور عوامی سطح پر کافی توجہ حاصل کر لی ہے۔
Discussion about this post