سینیٹ کی خالی نشستوں پر ووٹنگ کا آغاز

سینیٹ کی 6 خالی نشست ہوئی ہیں جن پر ضمنی انتخاب کے لیے پولنگ کی شروعات ہوچکی ہے۔ ووٹنگ کا عمل قومی اسمبلی، سندھ اور بلوچستان اسمبلی میں ہورہا ہے، تینوں ایوان کے ممبران اپنا حق رائے دہی استعمال کررہے ہیں جو شام 4 بجے تک جاری رہے گی۔ یاد رہے کہ سینیٹ کی اسلام آباد کی ایک ، سندھ کی 2 اور بلوچستان کی 3 نشستوں پر انتخاب ہورہا ہے۔ حلف اٹھانے والے 311 ارکان قومی اسمبلی سینیٹ کی نشستوں کے لیے ووٹ ڈالیں گے۔ قومی اسمبلی کے لیے ظفر اقبال کو ریٹرننگ افسر مقرر کیا گیا ہے۔ یہ  نشستیں 6 سینیٹرز یوسف رضا گیلانی ، مولانا عبدالغفور حیدری، نثارکھوڑو ، جام مہتاب، پرنس احمدعمر اور سرفرازبگٹی کے مستعفی ہونے پر خالی ہوئی ہیں۔ قومی اسمبلی میں سنی اتحاد کونسل کے الیاس مہربان اور پیپلز پارٹی کے یوسف رضا گیلانی کے درمیان مقابلہ  ہے۔  سندھ کی نشستوں پر پیپلزپارٹی کےجام سیف اللہ دھاریجو اور محمد اسلم ابڑو کا سنی اتحاد کونسل کے نذیراللہ اور شازیہ سہیل سے مقابلہ ہے۔ اسی طرح  بلوچستان کی 3  نشستوں پر 9 امیدوار مد مقابل ہیں۔ پیپلز پارٹی نے عبدالقدوس بزنجو، طارق حسین بگٹی اور شکیل درانی کو ٹکٹ جاری کیا ہے۔ ن لیگ نے میر دوستین ڈومکی ، جے یو آئی نے عبدالشکور غبیزئی ، بلوچستان عوامی پارٹی نے مبین خلجی اور کہدہ بابرکو مقابلے میں اتارا گیا ہے۔ آزاد امیدوار حیربیار ڈومکی اور سید محمود شاہ بھی قسمت آزمائی کریں گے۔