بحریہ ٹاؤن نے اپنی جائیدادوں کی نیلامی رکوانے کے لیے سپریم کورٹ سے رجوع کر لیا ہے۔ یہ اپیل فاروق ایچ نائیک کے ذریعے دائر کی گئی ہے، جس میں استدعا کی گئی ہے کہ اسلام آباد ہائیکورٹ کے فیصلے کو معطل کیا جائے اور 7 اگست کو ہونے والی نیلامی روک دی جائے۔ گزشتہ روز اسلام آباد ہائیکورٹ نے بحریہ ٹاؤن کی درخواستیں مسترد کرتے ہوئے قومی احتساب بیورو (نیب) کو جائیدادوں کی نیلامی کی اجازت دی تھی۔ یہ فیصلہ چیف جسٹس سرفراز ڈوگر کی سربراہی میں دو رکنی بینچ نے دیا تھا۔ نیب کے مطابق 7 اگست کو راولپنڈی اور اسلام آباد میں بحریہ ٹاؤن کی متعدد جائیدادیں نیلام ہوں گی۔ ان میں بحریہ ٹاؤن کارپوریٹ آفس، پارک روڈ کے پلاٹس، روبیش مارکی اینڈ لان، بحریہ گارڈن سٹی اور گالف کورس کے قریب موجود پراپرٹیز شامل ہیں۔ ملک ریاض کی دیگر جائیدادوں کی نیلامی بھی اسی دن عمل میں لائی جائے گی۔
Discussion about this post