جمعرات کے روز دبئی کے مشہور زمانہ ایجنڈا ایرینا میں ہونے والی رشین بیسڈ اے سی اے (Absolute Championship Akhmat) فائٹ نائٹ کا سب سے توجہ کھینچنے والا لمحہ وہ ہوگا جب ناقابلِ شکست پاکستانی فائٹر رضوان علی ’دی حیدر‘ ایک بار پھر پنجرے میں قدم رکھیں گے۔ اس بار روایتی حریف ملک بھارت کے رانا رودر پرتاپ سنگھ اُن کے سامنے ہوں گے۔
رضوان 10–0 کے بے داغ ریکارڈ کے ساتھ کیج میں اتریں گے۔ اگست میں مصر کے ادھم محمد کے خلاف سخت مقابلے میں فتح کے بعد وہ ایک بار پھر اپنی دھاک بٹھانے اور اپنے تسلسل کو ثابت کرنے کے لیے تیار ہیں۔ بھارتی فائٹرز کے مقابل گزشتہ برس اُن کی تین تابڑ توڑ ناک آؤٹ فتوحات پہلے ہی ان کا ذہنی پلڑا بھاری کر چکی ہیں، اور وہ آج پاکستان کے اُبھرتے ہوئے ایم ایم اے سُپر اسٹار کی حیثیت رکھتے ہیں۔ان کے حریف 28 سالہ رانا رودر پرتاپ سنگھ (12–2) زیادہ تر بینٹم ویٹ ڈیویژن میں لڑے ہیں، یہی عنصر اس مقابلے کو مزید غیر متوقع اور خطرناک بنا دیتا ہے۔ دونوں کے لیے یہ ایک ہائی رسک مگر ہائی ریوارڈ فائٹ ہے۔
View this post on Instagram
پاکستان ایم ایم اے فیڈریشن کے مطابق اس ایونٹ میں یو ایف سی (Ultimate Fighting Championship) کے آفیشلز کی موجودگی متوقع ہے، یہ وہی مہکتی ہوا ہے جو رضوان کے دیرینہ خواب سے براہِ راست جڑی ہوئی ہے۔ رضوان نے اسی برس ایک انٹرویو میں کہا تھا:
“یو ایف سی میں کوئی پاکستانی فائٹر نہیں… اور میں چاہتا ہوں کہ پہلا نام میرا ہو۔”
یہ فائٹ اُس دور میں ہو رہی ہے جب پاکستانی ایم ایم اے عالمی نقشے پر تیزی سے اُبھرتا دکھائی دے رہا ہے۔ جارجیا میں شہاب علی، عبدالمنان اور ایان حسین کی حالیہ جیتوں نے بین الاقوامی سطح پر پاکستان کی موجودگی کو پہلے سے کہیں زیادہ سنگین انداز میں منوایا ہے۔اگر ’’دی حیدر‘‘ نے یہ لڑائی جیت لی تو وہ نہ صرف اپنے ناقابلِ شکست ریکارڈ کی بقا کا دفاع کریں گے بلکہ ممکن ہے کہ وہ یو ایف سی کے دروازے پاکستانی فائٹرز کے لیے کھول دیں یوں وہ پاکستان کی فائٹنگ اسپورٹس ہسٹری میں عہدِ نو کے پہلے علمبردار کے طور پر صفحۂ تاریخ پر اپنا نام درج کر دیں گے۔
Discussion about this post