پنجاب : غیر قانونی اسلحہ جمع کرانے کا ایک ماہ کا الٹی میٹم جاری

پنجاب میں اسلحے کی نگرانی اور امن و امان کی بہتری کے لیے محکمہ داخلہ پنجاب نے ایک اہم اور سخت فیصلہ کرتے ہوئے صوبے بھر میں غیر قانونی اسلحہ جمع کرانے کے لیے ایک ماہ کی مہلت دے دی ہے۔جاری کردہ اعلامیے کے مطابق، تمام شہریوں کو ہدایت کی گئی ہے کہ وہ اپنے قانونی اسلحے کو ایک ماہ کے اندر اندر قریبی خدمت مرکز میں رجسٹر کروائیں۔ ساتھ ہی اسلحہ فروشوں اور لائسنس یافتہ ڈیلرز کے اسٹاک کا مکمل معائنہ کرنے کا بھی حکم جاری کیا گیا ہے تاکہ غیر قانونی اسلحے کے پھیلاؤ پر قابو پایا جا سکے۔اعلامیے میں واضح کیا گیا ہے کہ پنجاب بھر میں نئے اسلحہ لائسنسز کے اجراء پر مکمل پابندی عائد کر دی گئی ہے۔

مزید برآں، پنجاب حکومت نے وفاقی حکومت سے اسلحہ فیکٹریوں اور مینوفیکچررز کو باقاعدہ ضابطے (ریگولرائزیشن) میں لانے کی سفارش بھی کر دی ہے۔محکمہ داخلہ کے مطابق، غیر قانونی اسلحہ رکھنے کی سزا میں اضافہ منظور کر لیا گیا ہے، اور اب اس جرم پر چودہ سال قید اور بیس لاکھ روپے تک جرمانہ عائد کیا جا سکے گا۔اعلامیے میں یہ بھی کہا گیا ہے کہ غیر قانونی اسلحہ رکھنا اب ناقابلِ ضمانت جرم تصور کیا جائے گا۔ یہ اقدام صوبے میں بڑھتے ہوئے جرائم اور اسلحے کے بے جا استعمال پر قابو پانے کے لیے ایک اہم پیش رفت قرار دیا جا رہا ہے