پی ٹی اے کی ٹیلی کام کمپنیوں کو ہنگامی ایڈوائزری

پاکستان میں شدید بارشوں اور ممکنہ سیلابی خطرات کے پیشِ نظر پاکستان ٹیلی کمیونیکیشن اتھارٹی (پی ٹی اے) نے تمام ٹیلی کام کمپنیوں کو ہنگامی اقدامات پر مبنی ایڈوائزری جاری کر دی ہے۔ ساتھ ہی قومی ایمرجنسی ٹیلی کمیونیکیشن کوآرڈینیشن سینٹر بھی قائم کر دیا گیا ہے تاکہ کسی بھی ہنگامی صورتِ حال میں فوری ردعمل ممکن بنایا جا سکے۔

ٹیلی کام کمپنیوں کو ہدایات:

• متبادل منصوبے فوری فعال کیے جائیں تاکہ ہنگامی حالات میں سروس متاثر نہ ہو۔

• سیلاب سے متاثرہ علاقوں میں موبائل اور انٹرنیٹ سروس کی بلا تعطل فراہمی یقینی بنائی جائے۔

• حساس علاقوں میں ٹیلی کام انفراسٹرکچر کی حفاظت کے لیے پیشگی اقدامات کیے جائیں۔

• کسی بڑی فنی خرابی کی صورت میں فوری طور پر پی ٹی اے ہیڈکوارٹر کو اطلاع دی جائے۔

ہر 6 گھنٹے بعد رپورٹ لازمی:

ٹیلی کام آپریٹرز کو ہدایت کی گئی ہے کہ وہ ہر چھ گھنٹے بعد سروس بحالی سے متعلق رپورٹ جمع کرائیں، تاکہ صورتحال کا تسلسل سے جائزہ لیا جا سکے۔

عوامی آگاہی اور معاونت:

• موبائل آپریٹرز کو کہا گیا ہے کہ سیلاب، انخلا، اور ہنگامی نمبرز سے متعلق معلومات قومی و علاقائی زبانوں میں فراہم کریں۔

• ریلیف اہلکاروں کو ترجیحی بنیادوں پر مواصلاتی معاونت دی جائے تاکہ امدادی سرگرمیوں میں رکاوٹ نہ آئے۔

• متاثرہ علاقوں میں عارضی موبائل یونٹس نصب کرنے کی ہدایت دی گئی ہے۔

شکایات کا ازالہ اور بنیادی سہولیات:

• لوکل لوپ آپریٹرز اپنی فرنچائزز کو شکایات کے فوری ازالے کے لیے فعال کریں۔

• ٹاپ اپ پوائنٹس پر صارفین کی سہولت کے لیے متحرک ٹیمیں تعینات کی جائیں۔

• سم، بیلنس ری چارج اور دیگر بنیادی سہولیات کی دستیابی کو ہر حال میں یقینی بنایا جائے۔

• فیلڈ آپریشنز کے لیے تربیت یافتہ عملہ مقامی سطح پر تعینات کیا جائے۔