وزیراعظم شہباز شریف نے ڈیرہ اسماعیل خان اور شمالی وزیرستان میں فتنہ الخوارج کے دہشت گردوں کے خلاف ہونے والی دو اہم اور کامیاب کارروائیوں پر سیکیورٹی فورسز کو زبردست خراجِ تحسین پیش کیا ہے۔ وزیراعظم نے کہا کہ عزمِ استحکام کے ویژن کے تحت فورسز نے دہشت گردی کے محاذ پر جو نمایاں کامیابیاں حاصل کی ہیں، وہ نہ صرف قابلِ فخر ہیں بلکہ ملک کے امن و استحکام کے لیے فیصلہ کن بھی ثابت ہو رہی ہیں۔ وزیراعظم کا کہنا تھا کہ فتنہ الخوارج کے 15 دہشت گردوں کا خاتمہ پاکستانی فورسز کی پیشہ ورانہ مہارت، عزم اور بہادری کا ثبوت ہے۔ انہوں نے واضح کیا کہ پوری قوم دہشت گردی کے خلاف اس جدوجہد میں اپنی مسلح افواج کے ساتھ مضبوطی سے کھڑی ہے اور ملک سے ہر قسم کی دہشت گردی کو جڑ سے اکھاڑ پھینکنے کا عزم پہلے سے زیادہ پختہ ہے۔
دوسری جانب شمالی وزیرستان اور ڈی آئی خان میں ہونے والے ان کامیاب آپریشنز پر وزیرِ داخلہ محسن نقوی نے بھی سیکیورٹی فورسز کی صلاحیتوں کو شاندار الفاظ میں سراہا۔ ان کا کہنا تھا کہ بھارتی حمایت یافتہ دہشت گردوں کو عبرتناک انجام تک پہنچانے پر فورسز واقعی ستائش کی مستحق ہیں، کیونکہ انہوں نے ایک بار پھر دشمن کے ناپاک عزائم خاک میں ملا دیے۔ محسن نقوی نے کہا کہ خیبر پختونخوا میں قیامِ امن کے لیے فورسز کی یہ کارروائیاں پوری قوم کی نظر میں انتہائی اہمیت رکھتی ہیں، اور دہشت گردوں کے مکمل خاتمے تک یہ آپریشنز اسی جذبے اور عزم کے ساتھ جاری رہیں گے۔
Discussion about this post