غزہ امن منصوبہ، مشرقِ وسطیٰ میں پائیدار امن کی جانب تاریخی پیش رفت ہے

وزیراعظم شہباز شریف نے کہا ہے کہ غزہ امن منصوبہ مشرقِ وسطیٰ میں دیرپا امن کے قیام کی سمت ایک نہایت اہم قدم ہے۔ایک بیان میں وزیراعظم نے بتایا کہ وہ آج صبح شرم الشیخ پہنچے ہیں، جہاں تاریخی "غزہ امن منصوبے” پر دستخط کی تقریب منعقد ہو رہی ہے۔ انہوں نے اس موقع پر صدر السیسی اور صدر ٹرمپ کا شکریہ ادا کرتے ہوئے کہا کہ ان دونوں رہنماؤں کی میزبانی اور قیادت اس کامیابی میں کلیدی کردار رکھتی ہے۔ وزیراعظم نے کہا کہ یہ لمحہ صدر ٹرمپ کی غیر معمولی قیادت اور اُن کے عزمِ صمیم کے بغیر ممکن نہیں تھا۔ ان کی یکسو جدوجہد نے برسوں سے جاری خونریزی، تباہی اور انسانی المیے کے خاتمے کی راہ ہموار کی۔شرم الشیخ میں ہونے والی اس تاریخی تقریب میں صدر ٹرمپ، وزیراعظم شہباز شریف سمیت کئی عالمی رہنما شریک ہوئے۔ وزیراعظم نے اپنے بیان میں کہا کہ "آج کی تقریب ایک نسل کش باب کے اختتام کی علامت ہے,  ایسا باب جس کے دوبارہ کھلنے سے عالمی برادری کو ہر قیمت پر روکنا ہو گا۔” انہوں نے مزید کہا کہ بہادر اور ثابت قدم فلسطینی عوام ایک آزاد فلسطین کے حقدار ہیں، وہی فلسطین جو 1967ء کی سرحدوں کے مطابق ہو، اور جس کا دارالحکومت القدس الشریف ہو۔ یہ معاہدہ عالمی برادری کی اس طویل جدوجہد کا مظہر ہے جو مشرقِ وسطیٰ میں امن، استحکام اور انصاف پر مبنی نظام کے قیام کے لیے جاری رہی ہے۔