پنجاب میں تباہ کن سیلاب: وزیراعظم اور وزیراعلیٰ کا متاثرہ اضلاع کا دورہ

وزیراعظم شہباز شریف اور وزیراعلیٰ پنجاب مریم نواز شریف نے جمعرات کے روز صوبے کے سیلاب متاثرہ اضلاع کا فضائی اور زمینی دورہ کیا۔ اس موقع پر انہیں دریائے راوی، چناب اور ستلج میں آنے والے طغیانی کے نتیجے میں ہونے والی تباہ کاریوں پر تفصیلی بریفنگ دی گئی۔ روانگی سے قبل چیئرمین این ڈی ایم اے لیفٹننٹ جنرل انعام حیدر نے وزیراعظم کو ملک بھر کی سیلابی صورتحال اور جاری ریسکیو و ریلیف سرگرمیوں سے آگاہ کیا۔

وزیراعظم کی ہدایات

فضائی معائنے کے دوران وزیراعظم کو نارووال اور گوجرانوالہ ڈویژن میں شدید متاثرہ علاقوں کے بارے میں آگاہ کیا گیا۔ وزیراعظم نے ہدایت کی کہ مزید جانی و مالی نقصان سے بچنے اور ریلیف آپریشن تیز کرنے کے لیے فوری اقدامات کیے جائیں۔

جانی نقصان اور تباہ کاریاں

سرکاری اعداد و شمار کے مطابق صرف گوجرانوالہ ڈویژن میں کم از کم 15 افراد جاں بحق ہوئے ہیں، جن میں سیالکوٹ کے 5، گجرات کے 4، نارووال کے 3، حافظ آباد کے 2 اور گوجرانوالہ کا 1 شہری شامل ہے۔ مزید 3 افراد تاحال لاپتہ ہیں۔

پنجاب بھر میں 6 لاکھ سے زائد افراد متاثر ہوئے ہیں، ایک لاکھ 50 ہزار سے زیادہ افراد اور 35 ہزار مویشیوں کو محفوظ مقامات پر منتقل کیا گیا۔ اب تک 769 دیہات زیرِ آب آ چکے ہیں جبکہ لاکھوں ایکڑ زرعی اراضی تباہ ہو گئی ہے۔

اقوام متحدہ کے ادارہ برائے انسانی امور (UNOCHA) کے مطابق اس سال مون سون سے ہونے والی اموات گزشتہ سال کے مقابلے میں تین گنا زیادہ ہیں۔

وزیراعظم شہباز شریف اور وزیراعلیٰ پنجاب مریم نواز نے سیلاب سے متاثرہ نارووال اور شکرگڑھ کے علاقوں کا ہیلی کاپٹر کے ذریعے فضائی جائزہ لیا اور متاثرہ صورتحال پر حکام سے تفصیلی بریفنگ حاصل کی۔ pic.twitter.com/8uuAo4yeLV

— Government of Punjab (@GovtofPunjabPK) August 28, 2025

کرتارپور گردوارہ بھی زیرِ آب

نارووال میں سیلابی ریلوں نے تاریخی گردوارہ دربار صاحب کرتارپور کے احاطے کو بھی متاثر کیا۔ تاہم ایمرجنسی ٹیموں نے بروقت کارروائی کرتے ہوئے وہاں پھنسے 150 سے زائد سکھ یاتریوں اور عملے کو بحفاظت نکال لیا۔ اس آپریشن کی نگرانی وفاقی وزیر احسن اقبال اور صوبائی وزیر رامیش سنگھ اروڑہ نے کی۔

بڑے پیمانے پر نقل مکانی

سیلابی پانی شیخوپورہ، ننکانہ صاحب، اوکاڑہ، فیصل آباد کی تحصیل تاندلیانوالہ اور ساہیوال کے کئی علاقوں میں پھیل گیا ہے۔

• ننکانہ صاحب کے دیہات ہیر، نواں کوٹ اور خضرا آباد زیر آب آ گئے۔

• اوکاڑہ کے قصبے جندران کلاں (آبادی 30 ہزار سے زائد) کو شدید نقصان پہنچا۔

• فیصل آباد میں 100 سے زائد بستیوں کو خطرہ لاحق ہے۔

ریلیف کیمپ اور امدادی سرگرمیاں

پنجاب حکومت نے متاثرہ اضلاع میں 263 ریلیف کیمپ اور 161 میڈیکل کیمپ قائم کیے ہیں۔ بے گھر خاندانوں کو خوراک، ادویات اور عارضی پناہ گاہیں فراہم کی جا رہی ہیں جبکہ ایمرجنسی ٹیمیں مسلسل الرٹ ہیں۔