وزیراعظم کی ہدایت، خیبرپختونخوا کے 9 اضلاع میں امدادی کارروائیاں تیز کرنے کا حکم

وزیراعظم شہباز شریف نے چیئرمین نیشنل ڈیزاسٹر مینجمنٹ اتھارٹی (این ڈی ایم اے) کو خیبرپختونخوا کے متاثرہ اضلاع میں فوری طور پر امدادی کارروائیاں تیز کرنے کی ہدایت دی ہے۔ وزیراعظم نے سماجی رابطے کی ویب سائٹ ’ایکس‘ پر کہا کہ کلاؤڈ برسٹ اور اچانک سیلاب سے ہونے والی تباہی پر شدید افسوس ہے۔ انہوں نے کہا کہ حکومت ریسکیو اور ریلیف آپریشن کے لیے تمام وسائل استعمال کر رہی ہے۔شہباز شریف کے مطابق سوات، بونیر، باجوڑ، تورغر، مانسہرہ، شانگلہ اور بٹ گرام میں امدادی کارروائیاں جاری ہیں، باجوڑ اور بٹ گرام پر خصوصی توجہ دی جا رہی ہے۔ متاثرہ رہائشیوں کو ریلیف دیا جا رہا ہے، زخمیوں کو طبی امداد فراہم کی جا رہی ہے جبکہ سڑکیں کھولنے اور رابطہ بحال کرنے کے لیے بھاری مشینری بھی لگائی گئی ہے۔ادھر وفاقی وزیر امور کشمیر و گلگت بلتستان امیر مقام نے کہا ہے کہ بارشوں اور سیلاب سے بڑی تباہی ہوئی ہے، جو 2005 کے زلزلے اور 2010 کے سیلاب جیسی ہے۔ انہوں نے کہا کہ متاثرین کی مدد کے لیے پوری قوم کو متحد ہونا ہوگا۔