پاکستان فٹبال میں نئی تاریخ , پہلی بار بوائز ٹیم کیلئے خاتون منیجر کا تقرر

پاکستان فٹبال فیڈریشن (پی ایف ایف) نے ایک تاریخی قدم اٹھاتے ہوئے ملک کی فٹبال تاریخ میں پہلی بار بوائز ٹیم کیلئے خاتون منیجر تعینات کر دی۔ عروج سہیل بٹ کو پاکستان انڈر 17 فٹبال ٹیم کا مینجر مقرر کیا گیا ہے۔ فیڈریشن کے مطابق عروج سہیل بٹ اس وقت پی ایف ایف میں بطور سیف گارڈنگ افسر خدمات انجام دے رہی ہیں اور فیفا و اے ایف سی سے سند یافتہ سیف گارڈنگ افسر ہیں۔ ان کی تعیناتی نوجوان کھلاڑیوں کے لیے ایک محفوظ، پیشہ ورانہ اور حوصلہ افزا ماحول فراہم کرنے کی جانب ایک اہم قدم ہے۔ پاکستان انڈر 17 فٹبال ٹیم اس سال ساف چیمپئن شپ اور ایشین کوالیفائر میں شرکت کرے گی۔ ساف انڈر 17 چیمپئن شپ کیلئے ٹرائلز 13 اگست کو اسلام آباد کے مہران فٹبال گراؤنڈ میں صبح 9 بجے سے شام 6 بجے تک ہوں گے۔ پی ایف ایف نے واضح کیا ہے کہ ٹرائلز میں شریک کھلاڑیوں کو اپنا ب-فارم اور موجودہ پاسپورٹ لازمی ساتھ لانا ہوگا۔