ویسٹ انڈیز کے خلاف سیریز کے لیے قومی اسکواڈ کا اعلان , نئے جوش، نئی امیدیں

پاکستان کرکٹ ٹیم ایک بار پھر بین الاقوامی میدانوں میں جھنڈے گاڑنے کو تیار ہے، کیونکہ ویسٹ انڈیز کے خلاف ون ڈے اور ٹی ٹوئنٹی سیریز کے لیے 16 رکنی اسکواڈ کا باقاعدہ اعلان کر دیا گیا ہے۔ اس ہائی وولٹیج سیریز میں تین ٹی ٹوئنٹی اور تین ون ڈے انٹرنیشنل میچز کھیلے جائیں گے، جو شائقین کرکٹ کے لیے ایک زبردست کرکٹ فیسٹیول ثابت ہوں گے۔ ون ڈے ٹیم کی قیادت حسبِ روایت محمد رضوان کریں گے، جبکہ تجربہ اور نوجوان جذبے کا حسین امتزاج اسکواڈ میں دکھائی دیتا ہے۔ شاہین شاہ آفریدی، بابر اعظم، سلمان علی آغا، عبداللّٰہ شفیق، فہیم اشرف، فخر زمان، حسن علی، نسیم شاہ اور صائم ایوب ون ڈے اسکواڈ کا حصہ ہیں، جو کسی بھی حریف کو چت کرنے کی مکمل صلاحیت رکھتے ہیں۔ نوجوان ستارے بھی اپنی روشنی بکھیرنے کو بےتاب ہیں۔ حسین طلعت، محمد نواز، حسن نواز، ابرار احمد، محمد حارث اور سفیان مقیم کو بھی اسکواڈ میں شامل کر کے مستقبل کی تیاریوں کو تقویت دی گئی ہے۔

ٹی ٹوئنٹی اسکواڈ میں بھی دھماکہ خیز کرکٹرز کی موجودگی سیریز کو دلچسپ بنائے گی۔ سلمان علی آغا، حارث رؤف، حسن علی، شاہین شاہ آفریدی، فہیم اشرف، فخر زمان، خوشدل شاہ، حسین طلعت، اور محمد نواز میدان میں اترنے کو تیار ہیں۔ ان کے ساتھ ساتھ حسن نواز، صائم ایوب، ابرار احمد، صاحبزادہ فرحان، محمد حارث اور سفیان مقیم بھی ٹیم کا حصہ ہوں گے، جو مخالفین پر بجلی بن کر گریں گے۔ قومی ٹیم 27 جولائی کو امریکہ روانہ ہوگی، جہاں وہ 31 جولائی، 2 اور 3 اگست کو تین سنسنی خیز ٹی ٹوئنٹی میچز کھیلے گی، جبکہ ون ڈے میچز 8، 10 اور 12 اگست کو شائقین کو ایک اور کرکٹ کا جنون عطا کریں گے۔ یہ سیریز نہ صرف کھلاڑیوں کے لیے خود کو منوانے کا بہترین موقع ہے بلکہ پاکستانیشائقین کے دلوں میں نئی اُمید اور جوش پیدا کرنے جا رہی ہے۔ کرکٹ کے دیوانے تیار ہو جائیں، کیونکہ گرین شرٹس پھر سے میدان مارنے کو ہیں!