ذکا اشرف کی کپتان اور کھلاڑیوں سے ملاقات

سری لنکن شہر کولمبو میں پی سی بی کی مینجمنٹ کمیٹی کے چیئرمین ذکا اشرف نے کپتان بابر اعظم سمیت دیگر سینئر کھلاڑیوں سے ملاقات کی۔ اس موقع پر انہوں نے کھلاڑیوں کا حوصلہ بڑھایا اور اس بات پر زور دیا کہ شکست اور فتح کھیل کا حصہ ہے اسی لیے پاکستانی ٹیم حوصلہ نہ ہارے۔ غلطیوں سے سبق سیکھیں اور اگلے میچز میں بہتر کارکردگی کا مظاہرہ کریں، جو ہونا تھا ہو گیا اب اگلے میچز پر فوکس کریں۔ ذکا اشرف کے مطابق سب کھلاڑیوں پر اعتماد ہے۔ کھلاڑی  ایشیا کپ جیتنے کی صلاحیت رکھتے ہیں۔ اس موقع پر بابراعظم اور دیگر کھلاڑیوں نے بھرپور اعتماد اور حوصلہ افزائی کرنے پر چیئرمین ذکا اشرف کا شکریہ ادا کیا۔ بابراعظم کا کہنا تھا کہ باقی میچز میں فتح کے لیے ایڑھی چوٹی کا زور لگادیں گے۔ 100 فیصد کھیل پیش کریں گے، ایشیا کپ پر فوکس ہے اور ہم ضرور کامیابی حاصل کریں گے۔