اورکزئی آپریشن : شہداء کے لہو کا انتقام، دشمن کا انجام

سیکیورٹی فورسز نے ضلع اورکزئی میں مصدقہ خفیہ اطلاعات پر مبنی ایک اہم کارروائی میں اورکزئی حملے میں ملوث تمام 30 بھارتی سرپرستی یافتہ خوارج کو ہلاک کر دیا۔پاک فوج کے شعبہ تعلقات عامہ (آئی ایس پی آر) کے مطابق یہ کارروائی جمال مایہ کے علاقے میں کی گئی، جہاں سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔ کارروائی کے نتیجے میں وہ تمام عناصر انجام کو پہنچا دیے گئے جو 7 اکتوبر کو ہونے والے اس حملے میں ملوث تھے، جس میں لیفٹیننٹ کرنل جنید طارق، میجر طیب راحت اور 9 دیگر جوانوں نے جامِ شہادت نوش کیا تھا۔ آئی ایس پی آر کے مطابق یہ کامیاب آپریشن نہ صرف شہید افسران اور جوانوں کے خون کا بدلہ ہے بلکہ اس نے واقعے کے اصل منصوبہ سازوں کو بھی کیفر کردار تک پہنچایا۔ علاقے میں کلیئرنس اور سینیٹائزیشن آپریشنز جاری ہیں تاکہ کسی بھی بھارتی سرپرستی یافتہ دہشت گرد کو فرار کا موقع نہ مل سکے۔فوجی ترجمان کے مطابق پاکستان کی سیکیورٹی فورسز دہشت گردی کے مکمل خاتمے اور ملکی سلامتی کے تحفظ کے لیے پُرعزم ہیں اور دشمن عناصر کے خلاف اپنی کارروائیاں جاری رکھیں گی۔ خیال رہے کہ اس سے قبل 7 اور 8 اکتوبر کی درمیانی شب بھی ایک کارروائی میں "فتنۃ الخوارج” تنظیم سے تعلق رکھنے والے 19 دہشت گرد واصل جہنم کیے گئے تھے، جن کا تعلق بھارت کے حمایت یافتہ نیٹ ورک سے بتایا گیا تھا۔