پاکستانی قونصل جنرل عامر احمد اتوزئی کی صفائی مہم میں شرکت

پاکستان کے قونصل جنرل برائے نیویارک، عامر احمد اتوزئی نے ماحولیاتی تحفظ اور کمیونٹی کی شراکت سے ہونے والی ایک صفائی مہم میں شرکت کی، جس کا اہتمام مسلم والنٹیئرز فار نیویارک نے روپرٹ پارک، مین ہٹن میں کیا تھا۔ اس اقدام کا مقصد شہر کی خوبصورتی میں اضافہ اور ماحول دوست طرزِ زندگی کو فروغ دینا تھا اس صفائی مہم میں پاکستانی نژاد امریکی خاندانوں، طلبہ، اور کمیونٹی کے افراد نے بڑی تعداد میں شرکت کی۔

شرکاء نے پارک کی صفائی، شجرکاری اور تزئین و آرائش میں بڑھ چڑھ کر حصہ لیا۔ یہ سرگرمی اس بات کا مظہر تھی کہ کمیونٹی میں ماحولیاتی بہتری اور اجتماعی ذمہ داری کا جذبہ بھرپور انداز میں موجود ہے۔ تقریب سے خطاب کرتے ہوئے قونصل جنرل عامر اتوزئی نے کمیونٹی کے جذبے کو سراہتے ہوئے کہا کہ  مجھے اپنی کمیونٹی پر فخر ہے کہ وہ نیویارک شہر کی ترقی اور ماحولیاتی بہتری میں بامعنی کردار ادا کر رہی ہے۔ ان کی یہ کوششیں شہری ذمہ داری کا مظہر اور اپنے شہر سے محبت کا ثبوت ہیں۔

روپرٹ پارک کی یہ صفائی مہم نہ صرف ماحول دوست سرگرمی تھی بلکہ کمیونٹی کو ایک دوسرے سے جوڑنے کا بھی ذریعہ بنی۔ اس اقدام نے یہ پیغام دیا کہ شہری مسائل کا حل باہمی تعاون اور رضاکارانہ جذبے سے ممکن ہے۔