کرم میں سیکیورٹی فورسز کی کارروائیاں، بھارتی حمایت یافتہ فتنہ الخوارج کے 23 دہشتگرد ہلاک

کرم میں سکیورٹی فورسز نے ایک بار پھر اپنی بے مثال پیشہ ورانہ مہارت اور جرات مندی کا لوہا منواتے ہوئے دو اہم کارروائیوں میں بھارتی حمایت یافتہ فتنۂ خوارج کے 23 دہشت گردوں کا خاتمہ کر دیا۔ یہ آپریشنز نہ صرف دہشت گردوں کے نیٹ ورک کے لیے کاری ضرب ثابت ہوئے بلکہ خطے میں دیرپا امن کی جانب ایک مضبوط قدم بھی ہیں۔ آئی ایس پی آر کے مطابق 19 نومبر 2025 کو ضلع کرم میں خوارج کی موجودگی کی مصدقہ اطلاعات ملتے ہی فورسز نے برق رفتار ٹارگٹڈ آپریشن شروع کیا۔ کارروائی کے دوران دہشت گردوں کے ٹھکانوں کو انتہائی موثر انداز میں نشانہ بنایا گیا، جس کے نتیجے میں شدید فائرنگ کے تبادلے کے دوران 12 دہشت گرد انجام کو پہنچے۔ اسی روز اسی علاقے میں ایک اور گروہ کی نشاندہی پر دوسرا آپریشن بھی بھرپور قوت سے کیا گیا۔ فورسز نے پوری حکمتِ عملی کے ساتھ علاقے کو گھیرے میں لیا اور مختصر مگر فیصلہ کن مقابلے میں مزید 11 خوارج کو ہلاک کر دیا، یوں دشمن کے گرداب کو جڑ سے اکھاڑ دیا گیا۔ سکیورٹی فورسز اور قانون نافذ کرنے والے ادارے عزمِ استحکام کے تحت اس عہد پر قائم ہیں کہ ملک میں کسی بھی بھارتی حمایت یافتہ دہشت گردانہ سرگرمی کو پنپنے نہیں دیا جائے گا۔ یہ آپریشنز ثابت کرتے ہیں کہ ریاست اپنے شہریوں کے تحفظ اور قومی سلامتی کے لیے ہر حد تک جانے کا حوصلہ رکھتی ہے۔ وزیراعظم شہباز شریف نے ان کامیاب کارروائیوں پر سکیورٹی فورسز کے افسروں اور جوانوں کو زبردست خراجِ تحسین پیش کیا۔ انہوں نے کہا کہ دہشت گردی کے مکمل خاتمے تک یہ جنگ بھرپور عزم کے ساتھ جاری رہے گی اور پوری قوم افواج پاکستان کے ساتھ کندھے سے کندھا ملا کر کھڑی ہے۔ وزیراعظم نے مزید کہا کہ وطن عزیز کی حفاظت کے مقدس مشن میں قوم اور فوج کا اتحاد ہماری سب سے بڑی طاقت ہے۔