بلوچستان کی سنگلاخ وادیوں میں پاک دھرتی کے محافظوں نے دشمنِ وطن کے ناپاک عزائم خاک میں ملا دیے۔ سکیورٹی فورسز نے دو مختلف کارروائیوں میں فتنۂ الہندوستان کے 18 دہشت گردوں کو جہنم واصل کردیا، یوں مادرِ وطن کے امن کے دشمن ایک بار پھر اپنے انجام کو پہنچے۔ آئی ایس پی آر کے مطابق 28 اور 29 اکتوبر کو بلوچستان کے ضلع کوئٹہ اور کیچ میں انٹیلی جنس بیسڈ آپریشنز کیے گئے۔ پہلی کارروائی چلتن کے پہاڑوں میں ہوئی، جہاں خفیہ اطلاع پر فورسز نے گھیرا تنگ کیا۔ فائرنگ کے شدید تبادلے میں 14 بھارتی پشت پناہی یافتہ دہشت گرد ہمیشہ کے لیے خاموش کر دیے گئے۔ دوسرا آپریشن ضلع کیچ کے علاقے بلیدہ میں کیا گیا، جہاں دہشت گردوں کے ایک ٹھکانے کو نشانہ بنایا گیا۔ چار دہشت گرد واصلِ جہنم ہوئے، جب کہ اسلحہ، گولہ بارود اور دھماکہ خیز مواد کی بڑی مقدار برآمد ہوئی۔ ترجمان پاک فوج کے مطابق، مارے گئے دہشت گرد ملک دشمن کارروائیوں میں ملوث تھے۔ علاقے میں سرچ اور کلیئرنس آپریشن جاری ہیں تاکہ فتنۂ الہندوستان کے کسی بھی باقی ماندہ آلۂ کار کو انجام تک پہنچایا جا سکے۔آئی ایس پی آر نے واضح کیا کہ ویژن “عزمِ استحکام” کے تحت انسدادِ دہشتگردی مہم پورے جوش و خروش سے جاری ہے، جس کا مقصد غیر ملکی سرپرستی یافتہ دہشت گردوں کا مکمل خاتمہ ہے۔
وزیراعظم کا خراجِ تحسین
وزیراعظم شہباز شریف نے کوئٹہ اور کیچ میں ہونے والی دونوں کامیاب کارروائیوں پر سکیورٹی فورسز کو زبردست خراجِ تحسین پیش کرتے ہوئے کہا:
“قوم اپنے جانباز سپوتوں پر فخر کرتی ہے، دہشتگردی کے خلاف جنگ میں ہم اپنی فورسز کے ساتھ کندھے سے کندھا ملا کر کھڑے ہیں۔”
انہوں نے مزید کہا کہ سکیورٹی فورسز کا عزم، حوصلہ اور قربانی ہی پاکستان کے امن کی ضمانت ہیں۔
وزیر داخلہ محسن نقوی کا بیان
وفاقی وزیر داخلہ محسن نقوی نے بھی فورسز کی بروقت کارروائیوں کو سراہتے ہوئے کہا کہ
“بلوچستان میں بھارتی اسپانسرڈ دہشتگردوں کو انجام تک پہنچانا سکیورٹی فورسز کی پیشہ ورانہ مہارت اور عزمِ صادق کا مظہر ہے۔”
انہوں نے کہا کہ 18 دہشت گردوں کو جہنم واصل کرنا دشمن کے لیے واضح پیغام ہے کہ پاکستان کے امن کے خلاف کوئی سازش کامیاب نہیں ہوگی۔وزیر داخلہ نے کہا، “ہم اپنے بہادر افسران اور جوانوں کی جرات و بہادری پر فخر کرتے ہیں، اور عہد کرتے ہیں کہ ملک سے دہشتگردی کا ہر سایہ مٹا کر دم لیں گے۔”
Discussion about this post