نیشنل اسٹیڈیم میں شاہد آفریدی، یونس خان کے نام سے انکلوژر منسوب کرنے کا فیصلہ

پی سی بی کے مطابق نیشنل بینک اسٹیڈیم میں ایک انکلوژر اسٹار کرکٹر شاہد آفریدی سے منسوب ہوگا جبکہ ایک انکلوژر سابق کپتان یونس خان کے نام سے ہوگا۔ نئے بننے والے پیٹرن انکلوژر کو ظہیر عباس اور ماجد خان کے نام سے منسوب کیا جائے گا۔ یاد رہے کہ چیمپئنز ٹرافی 2025 سے قبل قذافی اسٹیڈیم لاہور اور نیشنل بینک کرکٹ اسٹیڈیم کراچی میں تزین و آرائش کا کام جاری ہے۔ نیشنل بینک کرکٹ اسٹیڈیم میں بھی تعمیراتی کام جاری ہے، اسٹیڈیم میں کھلاڑیوں اور آفیشنلز کے لیے نیا انکلوژر بھی بنایا گیا ہے، اس کے علاوہ 350 ایل ای ڈی لائٹس نصب کی گئی ہیں تاکہ فینز بہترین کھیل سے لطف اندوز ہوسکیں گے۔  اسٹیڈیم میں2  ڈیجیٹل ری پلے اسکرینز پہلے ہی نصب کی جاچکی ہیں جبکہ 5 ہزار نئی کرسیوں کو بھی لگایا گیا ہے۔ آئی سی سی چیمپئنز ٹرافی 2025 کا آغاز 19 فروری سے پاکستان میں ہو رہا ہے جب کہ بھارت اپنا پہلا میچ 20 فروری کو بنگلہ دیش کے خلاف دبئی میں کھیلے گا۔ اُدھر چیمپئنز ٹرافی کے لیے لاہور میں قذافی اسٹیڈیم کی گنجائش 35 ہزار تماشائیوں تک بڑھا دی گئی ہے اور پورے اسٹیڈیم میں نئی کرسیاں بھی لگائی گئی ہیں، اسٹیڈیم میں براڈکاسٹ کے معیار کو بہتر بنانے کے لیے 480 جدید ایل ای ڈی لائٹس نصب کی گئی ہیں جو شائقین کو شاندار کھیل دکھانے میں اہم کردار ادا کریں گی۔