فیلڈ مارشل کے صدر بننے کا کوئی خیال موجود نہیں، وزیر داخلہ

وفاقی وزیرِ داخلہ محسن نقوی نے صدرِ پاکستان آصف علی زرداری کے استعفے سے متعلق تمام قیاس آرائیوں کو سختی سے مسترد کرتے ہوئے کہا ہے کہ ایسی کوئی تجویز زیرِ غور نہیں اور نہ ہی اس حوالے سے کوئی بات چیت ہوئی ہے۔ ان کا کہنا تھا کہ فیلڈ مارشل سید عاصم منیر کے صدر پاکستان بننے سے متعلق بھی کوئی سوچ یا تجویز موجود نہیں۔ اپنے ایک بیان میں محسن نقوی نے کہا کہ وہ بخوبی جانتے ہیں کہ صدر، وزیراعظم اور آرمی چیف کے خلاف مہم کے پیچھے کون عناصر کارفرما ہیں، یہ بھی واضح ہے کہ یہ مہم کیوں چلائی جا رہی ہے اور اس کا فائدہ کسے پہنچ رہا ہے۔ انہوں نے زور دیتے ہوئے کہا کہ صدرِ مملکت کا مسلح افواج کی قیادت کے ساتھ مضبوط اور وقار پر مبنی تعلق قائم ہے، جبکہ فیلڈ مارشل سید عاصم منیر کی پوری توجہ صرف اور صرف پاکستان کے استحکام اور طاقت پر مرکوز ہے۔

We are fully aware of who is behind the malicious campaign targeting President Asif Ali Zardari, Prime Minister Shahbaz Sharif, and the Chief of Army Staff. I have categorically stated that there has been no discussion,nor does any such idea exist,about the President being asked…

— Mohsin Naqvi (@MohsinnaqviC42) July 10, 2025

وزیرِ داخلہ کا کہنا تھا کہ جو عناصر جھوٹے بیانیے کے ذریعے افواہیں پھیلا رہے ہیں، اُن کے لیے پیغام ہے کہ وہ دشمن ایجنسیوں سے مل کر جو کچھ کرنا چاہتے ہیں کر لیں، لیکن ہم پاکستان کو مستحکم اور مضبوط بنانے کے لیے ہر ضروری اقدام کریں گے۔ محسن نقوی نے مزید کہا کہ انہیں اس پروپیگنڈا مہم کے تمام محرکات کا علم ہے، یہ بھی معلوم ہے کہ جھوٹ کس نے پھیلایا اور اس سے فائدہ کسے ہو رہا ہے۔ ان کا کہنا تھا کہ یہ سب بے بنیاد سازشیں ہیں جن کا مقصد قومی قیادت پر عدم اعتماد پیدا کرنا ہے، لیکن ایسی کوششیں ہر بار کی طرح ناکام ہوں گی۔