سفیر رضوان سعید شیخ کی لاس اینجلس میں "یومِ تشکر” کی تقریب

امریکہ میں پاکستان کے سفیر رضوان سعید شیخ نے فرینڈز آف پاکستان کی جانب سے لاس اینجلس میں منعقدہ یومِ تشکر کی خصوصی تقریب میں شرکت کی۔ اس موقع پر کیلیفورنیا اور نیواڈا سے تعلق رکھنے والے پاکستانی نژاد امریکی افراد کی بڑی تعداد موجود تھی، جنہوں نے سفیر کا پرتپاک خیرمقدم کیا اور پاکستانی کمیونٹی کی نمائندگی کے لیےایف او پی کی کاوشوں کو سراہا۔ اپنے خطاب میں، سفیر شیخ نے فرینڈز آف پاکستان اور پاکستانی کمیونٹی کا شکریہ ادا کیا اور اس بات پر زور دیا کہ امریکہ میں مقیم پاکستانی کمیونٹی پاکستان اور امریکہ کے درمیان مضبوط روابط قائم کرنے میں ایک اہم ستون ہے۔ انہوں نے کاروبار، سائنس و ٹیکنالوجی، تعلیم، اور ثقافت کے میدان میں کمیونٹی کی قابلِ قدر خدمات کا اعتراف کیا۔

سفیر سعید شیخ نے حالیہ پاک بھارت تنازع کا حوالہ دیتے ہوئے اسے معرکۂ حق  قرار دیا۔ انہوں نے پاکستان کی مسلح افواج کی بہادری اور پیشہ ورانہ صلاحیت کو سراہا اور اوورسیز پاکستانیوں کی غیرمتزلزل حمایت پر ان کا شکریہ ادا کیا۔ انہوں نے کہا کہ یومِ تشکر قومی وقار، اتحاد، اور فخر کی علامت ہے۔ پاکستانی سفیر نے حالیہ جنگ بندی میں امریکی حکومت کے تعمیری کردار اور مسئلہ جموں و کشمیر کے پرامن حل کے لیے اس کی کوششوں کی تعریف کی۔ تقریب کے دوران، سفیر شیخ نے کمیونٹی ارکان سے ملاقات کی اور معاشی ترقی، ثقافتی تبادلے، اور عوامی رابطوں کے ذریعے پاکستان اور امریکہ کے درمیان تعاون کو مزید مضبوط بنانے کے لیے خیالات کا تبادلہ کیا۔ تقریب کا ماحول حب الوطنی کے جذبے اور قومی یکجہتی سے بھرپور تھا، جو بیرون ملک مقیم پاکستانیوں کی اپنے وطن سے گہری وابستگی کا مظہر ہے۔