پاکستان، سعودی عرب کا کرکٹ کی ترقی کے لیے نئے اقدامات پر اتفاق

پاکستان کے وفاقی وزیر داخلہ اور پاکستان کرکٹ بورڈ کے سربراہ محسن نقوی نے سعودی عرب کے وزیر کھیل شہزادہ عبدالعزیز بن ترکی الفیصل سے ریاض میں اہم ملاقات کی، جس میں سعودی عرب میں کرکٹ کے فروغ اور دونوں ممالک کے درمیان کھیلوں کے شعبے میں تعاون کو نئی بلندیوں تک لے جانے پر مفصل بات چیت ہوئی۔ محسن نقوی نے کہا کہ ملاقات میں نوجوانوں کو کھیلوں کے ذریعے مثبت سرگرمیوں میں شامل کرنے اور مشترکہ کھیلوں کے منصوبوں کو مزید مستحکم بنانے پر تبادلہ خیال کیا گیا۔ دونوں رہنماؤں نے سعودی عرب میں کرکٹ کے انفراسٹرکچر کو مضبوط بنانے، مشترکہ ٹریننگ پروگرامز کا انعقاد، باہمی دورے اور جونیئر و یوتھ لیول ٹورنامنٹس کے ذریعے نوجوانوں کے لیے بے شمار مواقع پیدا کرنے پر اتفاق کیا۔ ملاقات میں یہ بھی فیصلہ ہوا کہ کھیلوں، خاص طور پر کرکٹ، کو دوستی اور علاقائی ہم آہنگی کا مضبوط پل بنانے کے لیے عملی منصوبہ بندی کے تحت جلد مشترکہ اقدامات کیے جائیں گے اور متعلقہ ادارے رابطوں کو تیز کریں گے تاکہ نوجوانوں کے لیے زیادہ سے زیادہ مثبت مواقع فراہم کیے جا سکیں۔

In Riyadh It was a pleasure to meet His Royal Highness Prince Abdulaziz bin Turki Al-Faisal, Minister of Sport of the Kingdom of Saudi Arabia.
We had a detailed discussion on promoting cricket in Saudi Arabia and creating new avenues for youth engagement and talent development.
I… pic.twitter.com/fovlWANPRN

— Mohsin Naqvi (@MohsinnaqviC42) November 25, 2025

محسن نقوی نے سعودی وزیر کھیل کی قیادت میں وژن 2030 کے تحت سعودی عرب میں کھیلوں کے شعبے میں شاندار ترقی کو سراہا اور کہا کہ سعودی قیادت کی سرپرستی میں مملکت کا بڑے بین الاقوامی ٹورنامنٹس کی میزبانی حاصل کرنا ایک نئی تاریخ رقم کر رہا ہے۔ انہوں نے سعودی وزیر کھیل کو ایشیا فٹ بال کنفیڈریشن کپ 2027، ایشین ونٹر گیمز 2029، ایشین گیمز 2034 اور فیفا ورلڈ کپ 2034 کی میزبانی حاصل کرنے پر مبارکباد بھی دی۔ یہ ملاقات نہ صرف کھیلوں کے شعبے میں تعلقات کو مزید مستحکم کرنے کا عزم ظاہر کرتی ہے بلکہ نوجوانوں کے لیے نئے مواقع اور روشن مستقبل کے دروازے کھولنے کی بلند ہمت اور مشترکہ وژن کا بھی مظہر ہے۔