کراچی شدید گرمی کی لپیٹ میں، ہیٹ اسٹروک کا خطرہ

کراچی ان دنوں شدید گرمی کی لپیٹ میں آچکا ہے، جبکہ سمندری ہواؤں کی مکمل بندش کے باعث موسم نہایت خشک اور جھلسا دینے والا ہوگیا ہے۔ محکمہ موسمیات نے ہیٹ اسٹروک کے خطرے کی وارننگ جاری کرتے ہوئے شہریوں کو خصوصی احتیاطی تدابیر اختیار کرنے کی ہدایت کی ہے۔ محکمہ موسمیات کے مطابق آج شہر کا درجہ حرارت 40 ڈگری سینٹی گریڈ سے تجاوز کر سکتا ہے، جبکہ ہوا میں نمی کا تناسب 61 فیصد ریکارڈ کیا گیا ہے۔ سمندری ہواؤں کی بندش نے گرمی کی شدت میں غیرمعمولی اضافہ کر دیا ہے، جو شہریوں کی صحت کے لیے خطرناک ثابت ہو سکتا ہے۔محکمہ کا کہنا ہے کہ شام کے وقت سمندری ہواؤں کی جزوی بحالی متوقع ہے، جبکہ دن بھر جنوب مشرقی سمت سے گرم اور خشک ہوائیں 25 سے 35 کلومیٹر فی گھنٹہ کی رفتار سے چلیں گی۔ اس دوران شہر کا آسمان مکمل طور پر صاف رہے گا اور بارش کا کوئی امکان نہیں ہے۔

دیگر شہروں کا حال

محکمہ موسمیات کے مطابق ملک کے بیشتر میدانی علاقے بھی شدید گرمی کی لپیٹ میں رہیں گے۔

• اسلام آباد میں دن کے وقت موسم خشک اور گرم رہے گا، تاہم شام یا رات میں آندھی اور بارش کی توقع ہے، چند مقامات پر ژالہ باری بھی ہو سکتی ہے۔

• خیبرپختونخوا کے مختلف اضلاع میں بھی گرمی کا راج ہے، تاہم مانسہرہ، کوہستان، ایبٹ آباد، ہری پور، چترال اور دیر میں بارش کا امکان ظاہر کیا گیا ہے۔

• پنجاب میں شدید گرمی کے ساتھ شام یا رات کے اوقات میں راولپنڈی، مری، گلیات، اٹک، چکوال، جہلم، میانوالی، خوشاب، بھکر، سرگودھا، گوجرانوالہ، گجرات، حافظ آباد، لاہور، فیصل آباد، سیالکوٹ، نارووال، شیخوپورہ، جھنگ، اوکاڑہ، ٹوبہ ٹیک سنگھ، بہاولنگر اور بہاولپور سمیت متعدد علاقوں میں بارش کی پیش گوئی کی گئی ہے۔

• سندھ اور بلوچستان کے بیشتر اضلاع میں موسم شدید گرم اور خشک رہنے کی توقع ہے۔

• کشمیر اور گلگت بلتستان میں گرج چمک کے ساتھ بارش اور تیز ہواؤں کا امکان ہے۔

شہریوں کے لیے ہدایات

ماہرین صحت اور محکمہ موسمیات نے شہریوں سے اپیل کی ہے کہ وہ شدید گرمی کے دوران:

• دھوپ میں غیر ضروری نکلنے سے گریز کریں

• ہلکے، کھلے رنگ کے کپڑے پہنیں

• پانی کا زیادہ سے زیادہ استعمال کریں

• بچوں اور بزرگوں کا خاص خیال رکھیں

• دوپہر کے اوقات میں باہر نکلنے سے پرہیز کریں