ایرانی جوابی وار کا خدشہ، اسرائیلی ایئرلائن کے طیارے ملک سے باہر منتقل

ایران کی جانب سے بڑے پیمانے پر ڈرون حملے کے بعد اسرائیل میں شدید سیکیورٹی خدشات نے جنم لے لیا ہے۔ صورتِ حال کے پیش نظر اسرائیلی ایئرلائن "آرکیا ایئرلائنز” نے اپنے تمام کمرشل طیارے اسرائیل سے باہر منتقل کرنے کا اعلان کر دیا ہے۔ ایئرلائن انتظامیہ کے مطابق، سیکیورٹی اداروں کی سفارشات کی روشنی میں یہ اقدام احتیاطاً اٹھایا گیا ہے تاکہ طیاروں کو ممکنہ ایرانی حملوں سے محفوظ رکھا جا سکے۔ ترجمان نے بتایا کہ تمام پروازیں فی الحال دوسرے ممالک کے محفوظ ہوائی اڈوں پر منتقل کر دی گئی ہیں۔ ادھر ایرانی میڈیا کا دعویٰ ہے کہ اسلامی جمہوریہ ایران نے اسرائیل پر جوابی کارروائی کرتے ہوئے 100 سے زائد ڈرونز لانچ کیے ہیں۔ ان میں زیادہ تر جدید "شہید 136” ڈرونز شامل ہیں جن کی رینج 2500 کلومیٹر اور رفتار 185 کلومیٹر فی گھنٹہ بتائی جاتی ہے۔ یہ ڈرونز خودکش حملے کرنے کی صلاحیت رکھتے ہیں۔اسرائیلی فوج کے ترجمان نے کہا ہے کہ ایرانی ڈرونز کے جواب میں اسرائیل کا دفاعی نظام مکمل طور پر متحرک ہے اور ان فضائی حملوں کو روکنے کے لیے بھرپور کارروائیاں کی جا رہی ہیں۔ ترجمان نے کہا کہ "ایران پر ہماری جوابی کارروائیاں جاری رہیں گی۔ دوسری جانب، اسرائیلی وزیر دفاع اور اعلیٰ عسکری حکام نے اس بات کا عندیہ دیا ہے کہ ایران کی جانب سے کسی بھی بڑے حملے کی صورت میں فوری اور فیصلہ کن ردعمل دیا جائے گا۔