سعودی نیول چیف کی جنرل ساحر شمشاد مرزا سے ملاقات

چیف آف نیول اسٹاف رائل سعودی نیول فورسز، وائس ایڈمرل محمد بن عبدالرحمن الغریبی نے جوائنٹ اسٹاف ہیڈکوارٹرز راولپنڈی میں چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے ملاقات کی۔ آئی ایس پی آر کے مطابق اس ملاقات میں مشرق وسطیٰ اور جنوبی ایشیا کی بدلتی ہوئی سیکیورٹی صورتحال پر بات چیت ہوئی، خاص طور پر بحری سلامتی سے متعلق امور پر توجہ دی گئی۔جنرل ساحر شمشاد مرزا نے اس موقع پر سعودی عرب کے ساتھ پاکستان کے دیرینہ برادرانہ تعلقات کو اجاگر کیا اور دونوں ممالک کے درمیان دفاعی تعاون کو مزید وسعت دینے کے عزم کا اظہار کیا۔معزز مہمان کے استقبال کے لیے پاک فوج کے تینوں شعبوں کے چاق و چوبند دستے نے انہیں گارڈ آف آنر بھی پیش کیا۔ یہ ملاقات پاکستان اور سعودی عرب کے درمیان مضبوط دفاعی شراکت کو مزید گہرا کرنے کی جانب ایک اہم قدم قرار دی جا رہی ہے۔