اسلام آباد پولیس کا بڑا فیصلہ: بغیر لائسنس ڈرائیور جیل جائیں گے

وفاقی دارالحکومت میں بغیر ڈرائیونگ لائسنس کے گاڑی چلانے والوں کے دن گنے جا چکے ہیں۔ اسلام آباد پولیس نے اعلان کیا ہے کہ یکم اکتوبر کے بعد ایسے ڈرائیوروں کے خلاف سخت کارروائی ہوگی، جس میں نہ صرف مقدمات درج ہوں گے بلکہ گرفتاریاں بھی کی جائیں گی۔ پولیس ذرائع کے مطابق، قانون سب کے لیے برابر ہوگا۔ چاہے گاڑی نجی ہو یا سرکاری، بلا امتیاز کارروائی عمل میں لائی جائے گی۔ آئی جی اسلام آباد علی ناصر رضوی نے ٹریفک پولیس کو واضح احکامات جاری کرتے ہوئے سرکاری ڈرائیورز کی سہولت کے لیے ان کے دفاتر میں لائسنس بنانے کے خصوصی مراکز بھی قائم کر دیے ہیں۔ ذرائع کا کہنا ہے کہ یکم اکتوبر کے بعد بغیر لائسنس ڈرائیور اور گاڑی دونوں تھانے کی حوالات میں بند ہوں گے۔ مقدمات کے اندراج کے ساتھ ساتھ ایسے افراد کو لائسنس کے حصول تک کریکٹر سرٹیفکیٹ بھی جاری نہیں کیا جائے گا۔سب سے سخت اقدام یہ ہے کہ نہ صرف شخصی ضمانت قبول نہیں ہوگی، بلکہ ایسے ڈرائیوروں کو کم از کم ایک رات حوالات میں گزارنی پڑے گی۔ اسلام آباد پولیس کے اس فیصلے نے واضح پیغام دے دیا ہے:
سڑکوں پر ڈرائیونگ کا حق صرف اسی کو ہے جس کے پاس لائسنس ہے۔