جمی کیمل اپنے شو کے ساتھ ٹی وی پر واپس

ڈزنی اسٹوڈیو نے تصدیق کی ہے کہ ٹی وی میزبان جمی کیمل اپنے شو "جمی کیمل لائیو” کے ساتھ 23 ستمبر کو دوبارہ ٹی وی پر واپس آ رہے ہیں۔

امریکی ٹی وی چینل ABC نے 17 ستمبر کو ان کے شو کو غیر معینہ مدت کے لیے آف ایئر کر دیا تھا، لیکن ایک ہفتے بعد ہی اسے دوبارہ نشر کرنے کا فیصلہ کیا گیا۔

خبر رساں ادارے رائٹرز کے مطابق، جمی کیمل کے شو کو امریکی صدر ڈونلڈ ٹرمپ کی جانب سے میڈیا پر تنقید اور ریگولیٹری دھمکیوں کے بعد معطل کیا گیا تھا۔ یہ پابندی اس وقت لگائی گئی جب کیمل نے قدامت پسند کارکن چارلی کرک کے قتل پر اپنے شو میں سخت تبصرے کیے تھے۔ چارلی کرک یوٹاہ ویلی یونیورسٹی میں ایک تقریب کے دوران گولی مار کر قتل کیے گئے تھے، اور جمی کیمل نے اپنے شو میں کہا تھا کہ ٹرمپ کے حامی قاتل کو خود سے الگ دکھانے کی کوشش کر رہے ہیں۔ ڈزنی نے شو کی واپسی کی تصدیق کرتے ہوئے کہا کہ کیمل کے تبصرے غلط وقت پر کیے گئے اور غیر حساس تھے۔ تاہم، کچھ مقامی اسٹیشنز جیسے نیکسٹ اسٹار اور سنکلیئر نے ابھی تک شو کو دوبارہ نشر کرنے کا فیصلہ نہیں کیا۔ ابھی یہ واضح نہیں کہ جمی کیمل اپنے تبصرے پر معافی مانگیں گے یا نہیں۔