سانحہ گل پلازہ کے متاثرہ دکانداروں کے لیے خوشخبری آ گئی ہے۔ گل پلازہ منیجمنٹ کمیٹی نے متاثرہ تاجروں کے روزگار کی بحالی کے لیے عارضی ماڈل تیار کر لیا ہے، جس کا مقصد رمضان اور عید کے موقع پر ان کی کمائی کو یقینی بنانا ہے۔ کمیٹی کے صدر تنویر پاستا نے ایکسپریس نیوز کو بتایا کہ گل پلازہ کے سامنے واقع دو قریبی شاپنگ سینٹرز کی انتظامیہ سے بات چیت جاری ہے۔ کامیاب مذاکرات کے بعد متاثرہ دکانداروں کو ان شاپنگ سینٹرز میں عارضی طور پر منتقل کیا جائے گا، تاکہ وہ جلد از جلد اپنا کاروبار شروع کر سکیں اور عید سیزن کی تیاریاں مکمل کر سکیں۔تنویر پاستا نے وزیراعلیٰ سندھ سید مراد علی شاہ کے اعلان کو تسلی بخش قرار دیا، جس میں گل پلازہ کے متاثرہ تاجروں کی بحالی اور بلڈنگ کی دوبارہ تعمیر کا وعدہ کیا گیا تھا۔ ان کے مطابق کراچی چیمبر آف کامرس کے کیمپ میں اب تک 350 دکانداروں نے اپنا اندراج کروا لیا ہے، اور یہ تعداد ہر روز بڑھ رہی ہے۔ انہوں نے مزید بتایا کہ 1200 متاثرہ دکانداروں کی رجسٹریشن کا عمل اتوار تک مکمل کر لیا جائے گا۔
رجسٹریشن کے بعد کراچی چیمبر تصدیقی عمل شروع کرے گا، اور تصدیق کے بعد متاثرہ تاجروں کے نقصانات کی تفصیلات سندھ حکومت کو فراہم کی جائیں گی، تاکہ ان کے لیے ریلیف پیکج کا عمل تیز رفتاری سے مکمل کیا جا سکے۔تنویر پاستا نے کہا کہ کمیٹی کی اولین کوشش یہی ہے کہ متاثرہ دکانداروں کو متبادل شاپنگ مراکز میں عارضی طور پر منتقل کر کے ان کے کاروبار کی بحالی یقینی بنائی جائے۔ انہوں نے کراچی چیمبر آف کامرس کے تعاون کو بھی سراہا، جس سے متاثرہ تاجروں کو ناصرف حوصلہ ملا بلکہ بحالی کے عمل میں تیزی بھی آئی ہے۔
Discussion about this post