کروڑوں ووٹرزکی حق رائے دہی سے محروم کی خبر سچ نہیں

الیکشن کمیشن کی جانب سے جاری بیان میں کہا گیا ہے کہ الیکشن ایکٹ 2017 کی دفعہ 27 کے مطابق کسی بھی ووٹر کا اندراج اس کے شناختی کارڈ کے مطابق مستقل یا موجودہ پتے پر کیا جاتا ہے جس کا آبادی کے اعداد و شمار سے کوئی تعلق نہیں ہے۔ مردم شماری   کسی بھی   شخص  کی ذاتی موجودگی  پر کی جاتی ہے جبکہ ووٹر کا اندراج   شناختی کارڈ  کے پتے کے مطابق   ہوتا ہے۔ الیکشن کمیشن کا کہنا ہے کہ مقامی اخبار میں شائع ہونے والے اس رپورٹ میں کوئی حقیقت  نہیں کہ ایک کروڑ 30 لاکھ افراد اپنا حق رائے دہی استعمال نہیں کرسکیں گے۔ تمام اہل افراد کے ووٹ کے اندراج کو یقینی بنانے کے لیے انتخابی فہرستوں کو28 ستمبر2023 سے غیر منجمد کیا ہے اور عوام کو میڈیا کے ذریعے ووٹ کے اندراج، اخراج اور درستگی کے بارے میں مسلسل باخبر رکھا جارہا ہے۔ یہ عمل 25 اکتوبر 2023 تک جاری رہے گا۔