پنجاب میں بلدیاتی انتخابات کے التواء سے متعلق معاملے پر الیکشن کمیشن آف پاکستان نے پنجاب حکومت کو نئی حلقہ بندیوں کی تکمیل کے لیے چار ہفتوں کا وقت دے دیا ہے اور اس حوالے سے باقاعدہ حکمنامہ بھی جاری کر دیا گیا ہے۔الیکشن کمیشن کے مطابق پنجاب حکومت نے نئے قانون کے تحت حد بندی کے لیے وقت کی درخواست کی تھی، جسے منظور کرتے ہوئے کمیشن نے پابندی کے ساتھ چار ہفتے کی مہلت دی ہے۔ کمیشن کا کہنا ہے کہ نئے ایکٹ کی منظوری کے بعد حلقہ بندی کا قانونی تقاضہ پورا کرنا لازم ہے۔سیکرٹری الیکشن کمیشن کی جانب سے چیف سیکرٹری پنجاب کو بھیجے گئے مراسلے میں ہدایت کی گئی ہے کہ حکومت مقررہ مدت میں ضروری ڈیٹا اور نقشے الیکشن کمیشن کو فراہم کرے، تاکہ نئی حلقہ بندیاں مکمل کی جا سکیں۔ مراسلے میں یہ بھی واضح کیا گیا ہے کہ اگر چار ہفتوں کے اندر یہ عمل نہ ہوا تو الیکشن کمیشن معاملہ خود اپنے طور پر دیکھے گا، اور مدت مکمل ہونے کے بعد فریقین کو دوبارہ سماعت کے لیے طلب کیا جائے گا۔الیکشن کمیشن نے مزید آگاہ کیا کہ بلدیاتی انتخابات پنجاب لوکل گورنمنٹ ایکٹ 2025ء کے تحت منعقد کیے جائیں گے اور 9 اکتوبر کو جاری کیا گیا سابقہ حلقہ بندی شیڈول واپس لیا جا چکا ہے۔
Discussion about this post