آرمی چیف اور فیلڈ مارشل سید عاصم منیر کا کہنا ہے کہ "آپریشن سندور” کے دوران بھارت اپنے فوجی اہداف حاصل کرنے میں مکمل ناکام رہا، اور اب اس ناکامی کو غیر منطقی توجیہات کے ذریعے چھپانے کی کوشش کر رہا ہے۔ فیلڈ مارشل عاصم منیر نے یہ بات نیشنل ڈیفنس یونیورسٹی (NDU) اسلام آباد میں ’نیشنل سیکیورٹی اینڈ وار کورس‘ کے شرکاء سے خطاب کے دوران کہی۔ انہوں نے کہا کہ بھارت کی یہ ناکامی اس کی آپریشنل تیاری، کمزور اسٹریٹجک سوچ اور جنگی فہم کی کمی کو نمایاں کرتی ہے۔ فیلڈ مارشل نے بھارت کے حالیہ بیانات پر کڑی تنقید کرتے ہوئے کہا:
"خالصتاً دوطرفہ فوجی تصادم میں دیگر ممالک کو گھسیٹنے کی کوشش بھارت کی ناقص سیاسی حکمت عملی ہے۔”
انہوں نے مزید کہا کہ بھارت کا خود کو ’نیٹ سیکیورٹی پرووائیڈر‘ ظاہر کرنا ایک فرضی کردار ہے، جو خطے کے ممالک کے لیے ناقابل قبول ہے، خاص طور پر جب یہ ممالک بھارت کے جارحانہ رویے اور ہندوتوا نظریے سے پہلے ہی تنگ آ چکے ہیں۔ فیلڈ مارشل نے کہا کہ:
"پاکستان کی خودمختاری اور سالمیت کو چیلنج کرنے کی کسی بھی کوشش کا فوری اور منہ توڑ جواب دیا جائے گا۔”
انہوں نے پاکستان کی پالیسی کو اصولی سفارت کاری، امن، باہمی احترام اور علاقائی استحکام پر مبنی قرار دیا، جو بھارت کے خودغرضانہ اور تنگ نظر رویے کے بالکل برعکس ہے۔ فیلڈ مارشل نے کہا کہ بھارت . پاکستان کی جنگی کامیابیوں خصوصاً "آپریشن بنیان مرصوص” میں پاکستان کی برتری تسلیم کرنے سے ہچکچا رہا ہے:
"بھارت کی جانب سے جاری بیانات اس بات کی عکاسی کرتے ہیں کہ وہ پاکستان کی دہائیوں پر مبنی حکمتِ عملی، مقامی صلاحیت، اور مضبوط اداروں کی کامیابی کو تسلیم کرنے سے گریزاں ہے۔”
فیلڈ مارشل عاصم منیر نے واضح کیا کہ:
"جنگیں میڈیا بیانات، فینسی درآمدی ہتھیاروں یا سیاسی نعروں سے نہیں بلکہ یقین، پیشہ ورانہ مہارت، اداروں کی مضبوطی اور قومی عزم سے جیتی جاتی ہیں۔”
انہوں نے کہا کہ بھارت ایک خودمختار ایٹمی ریاست کے خلاف اشتعال انگیزی کے نتائج کو سمجھنے میں ناکام رہا ہے، اور اگر وہ خطے میں امن کو سبوتاژ کرنے کی کوشش کرے گا تو ذمہ داری بھارت پر ہی عائد ہوگی۔
Discussion about this post