ایئر چیف مارشل کا اسپیکر قومی اسمبلی کے نام اظہارِ تشکر کا خط

پاک فضائیہ کے سربراہ ایئر چیف مارشل ظہیر احمد بابر سدھو نے اسپیکر قومی اسمبلی ایاز صادق کے نام اظہارِ تشکر کا خط تحریر کیا ہے۔ یہ خط اسپیکر کے اُس مراسلے کے جواب میں لکھا گیا ہے جو انہوں نے بھارتی جارحیت پر مسلح افواج، بالخصوص پاک فضائیہ کی غیرمعمولی بہادری اور پیشہ ورانہ کارکردگی پر خراجِ تحسین پیش کرتے ہوئے ارسال کیا تھا۔ اسپیکر نے اپنے پیغام میں پارلیمان کی جانب سے افواجِ پاکستان کے ساتھ غیر متزلزل حمایت اور مکمل یکجہتی کا اظہار کیا تھا۔ ایئر چیف مارشل ظہیر احمد بابر سدھو نے اپنے خط میں اسپیکر قومی اسمبلی کی پارلیمانی قیادت کو سراہا اور کہا کہ بھارتی جارحیت کے خلاف قومی اتحاد اور یکجہتی پیدا کرنے میں ان کا کردار قابلِ تحسین ہے۔ انہوں نے کہا کہ قومی اسمبلی کے معزز اراکین کی جانب سے پاک فضائیہ کے ساتھ اظہارِ یکجہتی ہمارے لیے باعثِ فخر ہے اور اس جذبے نے قومی وقار کو مزید بلند کیا۔ ایئر چیف نے لکھا کہ دشمن کو مؤثر جواب دینے پر پارلیمانی و قومی قیادت کا خراجِ تحسین ہمیشہ یاد رکھا جائے گا۔ پاک فضائیہ کی کامیابی اخدا تعالیٰ کی خاص عنایت اور پوری قوم کے اتحاد و اتفاق کا نتیجہ ہے، جس نے دشمن کے ناپاک عزائم کو ناکام بنایا۔ انہوں نے کہا کہ پاک فضائیہ ملک کی خودمختاری اور فضائی سرحدوں کے تحفظ کے لیے ہر لمحہ تیار ہے اور قوم کے اعتماد کو اپنی طاقت سمجھتی ہے۔