معروف آرکیٹکٹ یاسمین لاری کی قیادت میں متحرک ہمارا کراچی موومنٹ نے ڈینسو ہال راہگزر واکنگ اسٹریٹ کراچی میں اسٹریٹ اسمبلی کے انعقاد کے ذریعے اپنی شہر گیر شہری مہم کا باضابطہ آغاز کر دیا۔ یہ اقدام حالیہ گل پلازہ سانحے کے تناظر میں اٹھایا گیا ہے جس کا مقصد کراچی بھر میں آگ سے بچاؤ کے معیارات کو بہتر بنانا اور شہری ذمہ داری کے شعور کو فروغ دینا ہے۔ یہ ایک منظم‘ بغیر کسی مالی معاونت اور غیر سیاسی کوشش ہے جو احتیاطی تدابیر‘ قانون کی پاسداری اور اجتماعی ذمہ داری پر زور دیتی ہے۔ہمارا کراچی کور کمیٹی نے ہیریٹج فاؤنڈیشن پاکستان، انسٹی ٹیوٹ آف آرکیٹیکٹس پاکستان اور ایسوسی ایشن آف کنسلٹنگ انجینئرز پاکستان کے تعاون سے اس اسمبلی کا اہتمام کیا۔ اجلاس میں راہ گزر کی عمارتوں اور ملحقہ میڈیسن مارکیٹ میں آگ سے تحفظ کے انتظامات کا تفصیلی جائزہ لیا گیا اور ممکنہ خطرات کی نشاندہی کی گئی۔ تقریب کا آغاز صبح ساڑھے گیارہ بجے عملی فائر ڈرل کے مظاہرے سے ہوا، جس کے بعد تلاوت قرآن پاک‘ استقبالیہ کلمات اور ایک جامع تکنیکی پریزنٹیشن پیش کی گئی جس میں حفاظتی اقدامات اور قابل عمل تجاویز پر تفصیل سے روشنی ڈالی گئی۔
سینئر انجینئر انجینئر فاروق محبوب نے میڈیسن مارکیٹ میں آتش زدگی سے متعلق خطرات پر ایک جامع اور مدلل پریزنٹیشن پیش کی۔ ان کی تحقیق علاقے کی عمارتوں کے تفصیلی سروے اور مالکان سے براہِ راست مشاورت پر مبنی تھی۔ انہوں نے عمارتوں کی ساختی کمزوریوں، بند گزرگاہوں‘ برقی خطرات اور مربوط انخلا منصوبہ بندی کے فقدان کی واضح نشاندہی کی۔ اس موقع پر نہایت واضح اور قابل عمل سفارشات پیش کی گئیں جن میں ہنگامی رسائی کے راستوں کو بہتر بنانا‘ فائر ڈیٹیکشن نظام کی لازمی تنصیب‘ باقاعدہ اخراجی راستوں کا تعین‘ چھت تک رسائی کی مؤثر منصوبہ بندی، برقی لوڈ مینجمنٹ‘ فائر ایکسٹنگوشرز اور ہائیڈرینٹ سسٹمز کی تنصیب‘ نیز مکینوں اور تاجروں کے لیے باقاعدہ تربیتی مشقوں کا انعقاد شامل ہے۔ سوال و جواب کے نشست میں رہائشیوں‘ دکانداروں اور پیشہ ور افراد نے تکنیکی ماہرین سے براہِ راست تبادلہ خیال کیا اور آئندہ کے عملی اقدامات پر سنجیدہ گفتگو کا موقع حاصل کیا۔منتظمین نے ڈی سی ساؤتھ جاوید کھوسو اور اے سی آرام باغ کا خصوصی شکریہ ادا کیا جن کے تعاون سے تقریب کا انعقاد سرکاری ضوابط اور اجازت ناموں کے مطابق خوش اسلوبی سے ممکن ہوا۔
Discussion about this post