ٹرمپ کی مسلمانوں کو ماہِ رمضان کی مبارکباد

امریکی صدر ڈونلڈ ٹرمپ نے رمضان المبارک کی آمد پر دنیا بھر کے مسلمانوں کو دل کی گہرائیوں سے مبارکباد پیش کی ہے ۔  ایک ایسا پیغام جو وائٹ ہاؤس کی آفیشل ویب سائٹ پر خصوصی طور پر جاری کیا گیا، اور جو مذہبی ہم آہنگی، روحانی تجدید اور امن کی خوبصورت عکاسی کرتا ہے۔ وائٹ ہاؤس کی ویب سائٹ پر شائع ہونے والے اس بیان میں صدر ٹرمپ نے لکھا ہے کہ ہر رمضان ایک مقدس موسم ہے جہاں روحانی تجدید، غور و فکر، اور خدا کی ان گنت نعمتوں کا شکر ادا کیا جاتا ہے۔ بہت سے امریکی شہریوں کے لیے یہ ماہِ مبارک نماز، روزہ اور خاندانی رشتوں کو مضبوط بنانے کا وقت ہوتا ہے۔ بیان میں مزید کہا گیا ہے کہ رمضان ہمدردی، عاجزی اور مشترکہ اقدار کی تصدیق کرتا ہے، جو انسانیت کی بنیاد ہیں۔ امریکی صدر نے زور دیا کہ خدا کا دیا ہوا آزادی سے عبادت کرنے کا حق امریکہ کی قومی شناخت اور خوشحالی کا مضبوط ستون ہے۔ اسی لیے ان کی انتظامیہ ہر روز یہ یقینی بناتی ہے کہ تمام شہری اپنے عقائد کے مطابق بغیر کسی خوف کے عبادت کر سکیں ۔

مذہبی آزادی کا مطلب ہے کہ کوئی بھی اپنے مذہب پر ظلم و ستم کے خوف سے آزاد رہے۔ پیغام کے اختتام پر صدر ٹرمپ نے دعا کی کہ اس پر وقار اور خیر سگالی کے وقت پوری دنیا میں خوشیاں، برکتیں، اتحاد اور امن قائم ہو۔ یہ کلمات نہ صرف مبارکباد ہیں بلکہ ایک عالمی سطح پر امن اور باہمی احترام کا خوبصورت پیغام بھی ہیں۔ اسی طرح، شاہ چارلس سوم نے بھی رمضان المبارک کی آمد پر برطانوی شاہی خاندان کی جانب سے ایک گرمجوشی سے بھرا پیغام جاری کیا، جس میں برطانیہ، دولت مشترکہ اور پوری دنیا کے مسلمانوں کو مبارکباد اور امن کی دعائیں پیش کی گئیں۔امریکہ، برطانیہ اور خلیجی ممالک سمیت دنیا بھر میں رمضان المبارک آج سے شروع ہو چکا ہے ۔  یہ مقدس مہینہ روزہ، عبادت، صدقہ اور رحمت کا مہینہ ہے، جو عید الفطر کی خوشیوں کے ساتھ اختتام پذیر ہوگا۔