مری میں شدید برفانی طوفان کی پیشگوئی کر دی گئی ہے، جس کے پیش نظر ڈی پی او مری ڈاکٹر محمد رضا تنویر سپرا نے ٹریول ایڈوائزری جاری کی ہے۔ڈی پی او نے خبردار کیا کہ پیر کی شام سے منگل کی شام تک مری میں شدید برفباری متوقع ہے، اس دوران سیاح اور شہری رات کے وقت مری کا سفر مکمل طور پر مؤخر کریں۔ انہوں نے کہا کہ شدید سردی اور برف کی وجہ سے سڑکیں بلیک آئس یعنی شیشے جیسی سخت برف کی تہہ میں تبدیل ہو سکتی ہیں، جہاں گاڑی کے بریک کام کرنا چھوڑ دیتے ہیں، اور رات کے سفر میں جان کے لیے سنگین خطرہ ہو سکتا ہے۔ ڈی پی او مری نے مزید کہا کہ اندھیرے اور دھند میں برف ہٹانے والی مشینری کا کام انتہائی مشکل ہو جاتا ہے، اس لیے کسی بھی گاڑی کو ٹائروں پر سنو چین کے بغیر مری میں داخلے کی اجازت نہیں دی جائے گی۔ انہوں نے شہریوں کو ہدایات دیں کہ روانگی سے قبل گاڑی کا فیول ٹینک مکمل بھرا ہوا ہو، مکینیکل فٹنس چیک کی گئی ہو، بریک، وائپرز، ہیٹر اور ڈی فوگر درست کام کر رہے ہوں، برف والی سڑکوں پر رفتار کم رکھیں اور اگلی گاڑی سے کم از کم 50 میٹر فاصلہ برقرار رکھیں۔
ڈاکٹر رضا تنویر نے مزید کہا کہ ہیٹر کے استعمال کے دوران شیشے کھلے رکھیں تاکہ آکسیجن کی کمی سے جانی نقصان نہ ہو، اور دھند و برفباری میں فوگ لائٹس اور ہیزرڈ لائٹس لازمی استعمال کریں۔ شاہراہوں یا ڈھلوانوں پر گاڑی پارک نہ کریں تاکہ برف ہٹانے کے عمل میں رکاوٹ نہ آئے، اور چیک پوسٹوں پر تعینات پولیس اہلکاروں کی ہدایات پر سختی سے عمل کریں۔ کسی بھی ہنگامی صورتحال یا حادثے کی صورت میں فوری پولیس ہیلپ لائن 15 پر رابطہ کریں۔
Discussion about this post