سینیٹ میں اپوزیشن کی قیادت کا معاملہ طے پا گیا، علامہ راجا ناصر عباس کو باضابطہ طور پر قائدِ حزبِ اختلاف مقرر کر دیا گیا۔ چیئرمین سینیٹ یوسف رضا گیلانی نے ایوان میں اعلان کرتے ہوئے رولنگ دی کہ علامہ راجا ناصر عباس کو سینیٹ کے 22 ارکان کی حمایت حاصل ہے، جس کے بعد ان کی تقرری کو حتمی حیثیت دے دی گئی۔ چیئرمین سینیٹ کے اعلان کے فوراً بعد سینیٹ سیکرٹریٹ نے اپوزیشن لیڈر کی تعیناتی کا نوٹیفکیشن بھی جاری کر دیا۔ یہ نوٹیفکیشن قائم مقام سیکرٹری سینیٹ کے دستخط سے جاری کیا گیا، جس کی نقول علامہ راجا ناصر عباس سمیت تمام ارکانِ سینیٹ کو ارسال کر دی گئیں۔ ایوان میں اس موقع پر اظہارِ خیال کرتے ہوئے وفاقی وزیرِ قانون اعظم نذیر تارڑ نے علامہ راجا ناصر عباس کو قائدِ حزبِ اختلاف بننے پر مبارکباد پیش کی۔ انہوں نے کہا کہ پارلیمانی لیڈر کو اپوزیشن لیڈر کی نشست پر بٹھایا گیا ہے اور توقع ہے کہ اختلافِ رائے اپنی جگہ، مگر ایوان کا ماحول بہتر اور مثبت رکھا جائے گا۔ علامہ راجا ناصر عباس کی بطور اپوزیشن لیڈر تقرری کے بعد سینیٹ میں پارلیمانی سیاست کا نیا مرحلہ شروع ہو گیا ہے، جہاں حکومتی اور اپوزیشن بنچوں کے درمیان مؤثر مکالمے اور بھرپور قانون سازی کی امید کی جا رہی ہے
Discussion about this post