پنجاب میں اسٹیج ڈراموں کی سخت نگرانی؛ 106 گانوں پر پابندی

پنجاب میں تھیٹر کے ماحول کو تبدیل کرنے اور اسٹیج کو دوبارہ خاندانی تفریح کا مرکز بنانے کے لیے ایک بڑا فیصلہ سامنے آ گیا ہے، جس کے تحت تھیٹر ڈراموں میں پیش کیے جانے والے 106 پنجابی گانوں پر مکمل پابندی عائد کر دی گئی ہے۔ پنجاب آرٹس کونسل اور محکمہ اطلاعات و ثقافت کے مطابق یہ اقدام اسٹیج ڈراموں کے مجموعی معیار کو بہتر بنانے اور ناظرین کو مہذب، معیاری اور فیملی فرینڈلی تفریح فراہم کرنے کی غرض سے کیا گیا ہے۔ حکام کا کہنا ہے کہ تھیٹر کا اصل مقصد تفریح کے ساتھ مثبت سماجی پیغام دینا ہے، جسے ہر صورت یقینی بنایا جائے گا۔ محکمے کے ذرائع کے مطابق پابندی کا شکار گانوں کی تفصیلی فہرست لاہور سمیت صوبے بھر کے تمام تھیٹرز کو بھجوا دی گئی ہے، تاکہ کسی قسم کی خلاف ورزی نہ ہو۔ اس کے ساتھ ہی اسٹیج مانیٹرنگ ٹیموں کو واضح ہدایات جاری کی گئی ہیں کہ وہ ان گانوں کو ڈراموں میں شامل کرنے یا ان کی اجازت دینے سے سختی سے گریز کریں۔ سرکاری مؤقف میں کہا گیا ہے کہ اس فیصلے کا مقصد اسٹیج تھیٹر کو دوبارہ ایک باوقار اور خاندانی تفریح کا پلیٹ فارم بنانا ہے، جہاں ہر عمر کے افراد بلا جھجک بیٹھ کر معیاری ڈرامے دیکھ سکیں اور اسٹیج آرٹ اپنی اصل شناخت بحال کر سکے۔