کراچی : پہلی بار فضائی ای چالان کا آغاز

پاکستان میں ٹریفک ریگولیشن کے نئے دور کا آغاز ہو گیا ہے۔ تاریخ میں پہلی مرتبہ کراچی میں فضائی ای چالان کا نظام متعارف کر دیا گیا ہے، اور ڈرونز کی مدد سے دو گاڑیوں پر بھاری جرمانے بھی عائد کیے جا چکے ہیں۔ اس جدید اقدام نے ٹریفک قوانین کی نگرانی کو نہ صرف تیز تر بنا دیا ہے بلکہ شہریوں کو خبردار بھی کر دیا ہے کہ اب قانون شکنی چھپانا ممکن نہیں رہا۔کراچی ٹریفک پولیس نے ڈرون سرویلنس کے ذریعے ای چالان کا باقاعدہ آغاز کر دیا ہے۔

صدر کے مختلف علاقوں میں ڈرونز نے خاموشی سے گشت کیا اور غلط پارکنگ کی نشاندہی کرتے ہوئے موقع پر ہی دونوں گاڑیوں کے خلاف کارروائی کی گئی۔ ڈی آئی جی ٹریفک پیر محمد شاہ نے بتایا کہ پہلے مرحلے میں غلط پارکنگ کرنے پر دونوں گاڑیوں کو فیس لیس ٹکٹ جاری کیے گئے، اور ہر مالک کو دس ہزار روپے کا چالان موصول ہوا۔ یہ چالان شام کے مصروف اوقات میں کیے گئے تاکہ شہریوں میں آگاہی کے ساتھ ساتھ نظم و ضبط بھی یقینی بنایا جا سکے۔ انہوں نے مزید کہا کہ خصوصی ٹیمیں ڈرونز کی مدد سے مختلف مقامات کی مانیٹرنگ کریں گی، اور جو بھی جان بوجھ کر غلط پارکنگ کرے گا، اسے فوری ای چالان ملے گا۔ ابتدا میں صدر موبائل مارکیٹ سے عبداللّٰہ ہارون روڈ تک کے علاقوں کو فضائی نگرانی میں لیا گیا ہے، جبکہ جلد ہی اس نظام کا دائرہ پورے کراچی تک بڑھا دیا جائے گا۔

ٹریفک پولیس کے اس جدید اقدام نے شہریوں کو واضح پیغام دے دیا ہے: اب قانون شکنی فضاء سے بھی دیکھی جا سکتی ہے، اس لیے احتیاط کریں اور قوانین کا احترام کریں، ورنہ چالان آپ سے پہلے آپ کی گاڑی تک پہنچ جائے گا۔