ایم ٹی وی کا اپنے عالمی آپریشنز بند کرنے کا اعلان

میوزک کی دنیا کو ایک صدمہ پہنچا ہے۔ وہ چینل جس نے نصف صدی تک نوجوانوں کے ذوق، فیشن، اندازِ زندگی اور موسیقی کے رجحانات کو نئی پہچان دی ,  اب خاموش ہونے جا رہا ہے۔ امریکی ٹی وی چینل ’’ایم ٹی وی‘‘، جس نے دنیا کو میوزک ویڈیوز کا نیا تصور دیا، اپنے تقریباً تمام عالمی آپریشنز بند کرنے کے قریب پہنچ چکا ہے۔ خبر رساں ادارے اے ایف پی کے مطابق یکم اگست 1981 کو جونہی اسکرین پر ’’ویڈیو کلڈ دی ریڈیو اسٹار‘‘ نشر ہوئی، موسیقی کی دنیا ایک نئے دور میں داخل ہوگئی۔ ریڈیو کے بعد اب تصویر نے آواز کو طاقت بخشی، اور ایم ٹی وی نوجوان نسل کی پہچان بن گیا۔ مگر اب، تقریباً پچاس برس بعد، یہی چینل اپنے سنہری دور کو الوداع کہنے جا رہا ہے۔ پیراماؤنٹ اسکائی ڈانس کی ملکیت میں موجود ایم ٹی وی نے باضابطہ اعلان کیا ہے کہ 2025 کے اختتام تک اس کی بین الاقوامی میوزک نشریات ہمیشہ کے لیے بند کر دی جائیں گی۔ برطانیہ، فرانس، جرمنی، پولینڈ، آسٹریلیا اور برازیل سمیت کئی ممالک میں ایم ٹی وی میوزک، ایم ٹی وی ہٹس اور 80 اور 90 کی دہائیوں کے مقبول پروگرامز کا چراغ گل ہو جائے گا۔ ماہرین کے مطابق اس تبدیلی کی سب سے بڑی وجہ ڈیجیٹل اسٹریمنگ پلیٹ فارمز جیسے یوٹیوب اور ٹک ٹاک ہیں، جہاں تیز، مختصر اور انٹرایکٹو مواد نے روایتی ٹی وی براڈکاسٹ کو پیچھے چھوڑ دیا ہے۔ یوں ایم ٹی وی کا  ’ایم‘، جو کبھی موسیقی کی علامت تھا، وقت کے ساتھ خود مٹتا چلا گیا۔ اعداد و شمار بھی اس زوال کی واضح تصویر پیش کرتے ہیں۔

جولائی 2025 تک برطانیہ میں ایم ٹی وی میوزک کی رسائی صرف 13 لاکھ گھروں تک رہ گئی ہے، جبکہ 2001 میں یہ تعداد ایک کروڑ سے تجاوز کر چکی تھی۔ اس فرق نے واضح کر دیا کہ ناظرین کی ترجیحات کس تیزی سے بدلی ہیں۔ ایم ٹی وی نے نہ صرف موسیقی بلکہ فیشن، فلم، نوجوانوں کے انداز گفتگو اور طرزِ زندگی کو بھی عالمی سطح پر متاثر کیا۔ 1984 کے ایم ٹی وی ویڈیو میوزک ایوارڈز میں مائیکل جیکسن کی ’’تھرلر‘‘ اور میڈونا کی ’’لائیک اے ورجن‘‘ جیسی تاریخی پرفارمنسز آج بھی یادوں میں تازہ ہیں۔ 90 کی دہائی میں یورپ میں ’’پارٹی زون‘‘ جیسے پروگرامز نے ڈانس اور کلب کلچر کو نئی زندگی بخشی۔ تاہم 2000 کے بعد جب ایم ٹی وی نے میوزک سے ہٹ کر ریئلٹی شوز اور تفریحی پروگرامز پر توجہ دینا شروع کی، تو اس کی اصل شناخت دھندلانے لگی۔ علاقائی ذیلی چینلز میں تقسیم اور میوزک مواد کی کمی نے اسے اس کی جڑوں سے دور کر دیا۔ پیراماؤنٹ اسکائی ڈانس کے ساتھ الحاق کے بعد اخراجات کم کرنے کے لیے ایک ہزار سے زائد ملازمین کو فارغ کیا جا چکا ہے۔ اگرچہ امریکا میں کچھ میوزک چینلز برقرار رہیں گے، لیکن برطانیہ کا مرکزی ایم ٹی وی ایچ ڈی چینل اب صرف تفریحی پروگرامز پر توجہ دے گا، موسیقی اس کا محور نہیں رہے گی۔

ادھر ایم ٹی وی کے مداح اور سابق ملازمین مطالبہ کر رہے ہیں کہ چینل کا قیمتی آرکائیو عوام کے لیے جاری کیا جائے تاکہ آنے والی نسلیں بھی اس تاریخی ورثے سے فیضیاب ہو سکیں۔ ایم ٹی وی کا اختتام صرف ایک ٹی وی چینل کا بند ہونا نہیں، بلکہ ایک پورے عہد کی خاموش رخصتی ہے ۔ ایک ایسا عہد جس نے کروڑوں نوجوانوں کو خواب دیے، انداز دیے، اور موسیقی کو زندگی کا حصہ بنا دیا۔