گیس مہنگی نہیں ہورہی

آئل اینڈ گیس ریگولیٹری اتھارٹی اوگرا نے گیس مہنگی ہونے کی خبروں کے بعد اہم وضاحت جاری کردی ہے۔ ترجمان کے مطابق گیس کی قیمتوں کے تعین سے متعلق غلط تاثر پھیلایا گیا، درحقیقت گیس ٹیرف میں کسی قسم کی منظوری یا تبدیلی نہیں کی گئی اور پرانے نرخ ہی برقرار ہیں۔ گزشتہ روز ترجمان اوگرا نے بیان میں واضح کیا تھا کہ سوئی نادرن کے لیے گیس کی اوسط قیمت میں 3 فیصد اور سوئی سدرن کے لیے 8 فیصد کمی کی تجویز دی گئی ہے۔ ادارے نے بتایا تھا کہ کمی کے بعد سوئی نادرن کے لیے تجویز کردہ قیمت 1804 روپے 8 پیسے فی ایم ایم بی ٹی یو جبکہ سوئی سدرن کے لیے 1549 روپے 41 پیسے فی ایم ایم بی ٹی یو ہے۔ تاہم بعد میں ایسی خبریں گردش کرنے لگیں کہ سوئی نادرن کی گیس قیمت 1852 روپے 80 پیسے اور سوئی سدرن کی 1777 روپے 2 پیسے فی ایم ایم بی ٹی یو کر دی گئی ہے، جس پر اوگرا نے صورتحال واضح کرتے ہوئے کہا کہ ایسی کوئی منظوری موجود نہیں اور موجودہ ریٹس بدستور برقرار ہیں۔