27 ویں ترمیم کے مسودے کی منظوری پر وفاقی کابینہ کا اجلاس ملتوی

وفاقی کابینہ کا آج طلب کیا گیا اجلاس، جس میں مجوزہ 27ویں آئینی ترمیم پر مشاورت ہونی تھی، اچانک ملتوی کر دیا گیا ہے۔ مطابق وزیراعظم شہباز شریف نے اجلاس آج صبح پونے 10 بجے کے لیے طلب کیا تھا، لیکن اب اس کے انعقاد کا فیصلہ بعد میں کیا جائے گا۔ ذرائع کا کہنا ہے کہ کابینہ اجلاس کی ملتوی ہونے کی وجہ حکومت کی اتحادی پاکستان پیپلز پارٹی کے تحفظات ہیں۔ پیپلز پارٹی کی سینٹرل ایگزیکٹو کمیٹی نے گزشتہ روز طویل غور و خوض کے بعد مجوزہ 27ویں آئینی ترمیم کی زیادہ تر شقوں کو مسترد کرتے ہوئے صرف آرٹیکل 243، جو مسلح افواج سے متعلق ہے، کو قبول کیا ہے۔ چیئرمین پیپلز پارٹی بلاول بھٹو زرداری نے واضح کیا کہ حکومت کے ساتھ مذاکرات جمعہ کو بھی جاری رہیں گے، تاہم صوبوں کے مالیاتی حقوق پر کسی صورت سمجھوتہ نہیں کیا جائے گا۔

اس سے قبل پیپلز پارٹی اور ایم کیو ایم پاکستان کے وفود نے وزیراعظم شہباز شریف سے علیحدہ ملاقاتیں کیں۔ وزیراعظم آفس کے بیان کے مطابق ایم کیو ایم پاکستان کے سات رکنی وفد کی قیادت کنوینر ڈاکٹر خالد مقبول صدیقی نے کی، جس میں گورنر سندھ کامران خان ٹیسوری، وزیر صحت سید مصطفیٰ کمال اور دیگر ارکان شامل تھے۔ ملاقات میں مجوزہ 27ویں آئینی ترمیم پر تفصیلی تبادلہ خیال کیا گیا۔ ایم کیو ایم-پی نے اس موقع پر مطالبہ کیا کہ مجوزہ آئینی ترمیم میں بلدیاتی حکومتوں کو خودمختاری دی جائے، جبکہ پیپلز پارٹی نے اپنی اہم تجاویز اور تحفظات پیش کیے، جن کے لیے (ن) لیگ کی حکومت نے حمایت طلب کی تھی۔پیپلز پارٹی کے وفد نے وزیراعظم سے مشاورت مکمل کرنے کے بعد خصوصی طیارے کے ذریعے کراچی واپسی کی، تاکہ سی ای سی اجلاس میں شرکت کی جا سکے۔ اس صورتحال سے واضح ہے کہ 27ویں آئینی ترمیم پر سیاسی مخاصمت اور اتحادی جماعتوں کے تحفظات اب بھی حکومت کے لیے ایک بڑی چیلنج بنے ہوئے ہیں۔