عمرہ زائرین کیلئے نئی شرط،30 دن کے اندر سفر لازمی

سعودی عرب کی وزارتِ حج و عمرہ نے اعلان کیا ہے کہ عمرہ ویزا حاصل کرنے والے زائرین کو اب 30 دن کے اندر سعودی عرب کا سفر کرنا لازمی ہوگا۔ اگر مقررہ مدت میں سفر نہ کیا گیا تو ویزا خود بخود منسوخ ہو جائے گا۔ اس سے قبل یہ مدت تین ماہ تھی، جسے اب کم کر کے ایک ماہ کر دیا گیا ہے، تاہم سعودی عرب میں قیام کی اجازت بدستور تین ماہ ہی رہے گی۔ سعودی قومی کمیٹی برائے عمرہ کے مشیر احمد با جیفر کے مطابق یہ نئے ضوابط آئندہ ہفتے سے نافذ العمل ہوں گے اور یہ اقدام عمرہ زائرین کی بڑھتی ہوئی تعداد کے پیشِ نظر ویزا سسٹم کو مزید منظم اور مؤثر بنانے کے لیے کیا گیا ہے۔ عرب نیوز کے مطابق، رواں سال جون سے اب تک 40 لاکھ سے زائد بین الاقوامی زائرین کے لیے عمرہ ویزے جاری کیے جا چکے ہیں، جو گزشتہ برسوں کے مقابلے میں ریکارڈ اضافہ ہے۔