پاک فوج دفاع وطن کے لیے ہر لمحہ تیار، بیرونی جارحیت کا جواب سخت ہوگا

ڈی جی آئی ایس پی آر لیفٹیننٹ جنرل احمد شریف چوہدری نے ایبٹ آباد میں اساتذہ اور طلباء سے ملاقات کے دوران حالیہ پاک افغان کشیدگی اور ملکی سیکیورٹی صورتِ حال پر روشنی ڈالی۔ انہوں نے کہا کہ پاک فوج ہمیشہ دفاعِ وطن کے لیے پُرعزم ہے اور کسی بھی بیرونی جارحیت کا جواب سخت اور مؤثر ہوگا۔ معرکہ حق سمیت اہم موضوعات پر تبادلہ خیال کرتے ہوئے انہوں نے واضح کیا کہ پاکستان نے دہشت گردی اور فتنہ الخوارج کے خلاف مؤثر اقدامات کیے ہیں۔ ڈی جی آئی ایس پی آر نے اس بات پر زور دیا کہ بلوچستان کے عوام اور نوجوانوں میں وطن سے محبت اور حب الوطنی کے جذبات فروغ پا رہے ہیں۔ اس موقع پر اساتذہ اور طلباء نے شہداء اور غازیان کو زبردست خراج تحسین پیش کیا۔ ہزارہ یونیورسٹی کے وائس چانسلر نے کہا کہ وطن سے محبت کا سب سے درست استعارہ پاک فوج ہے۔ اساتذہ نے طلباء کو آگاہ کیا کہ دشمن عناصر کی سرگرمیاں بڑھ گئی ہیں تاکہ نوجوانوں کے ذہنوں کو گمراہ کیا جا سکے۔ طلباء نے گفتگو میں کہا کہ آج انہیں پاک فوج کے خلاف پھیلائی جانے والی غلط معلومات کے متعلق درست اور حقیقی معلومات حاصل ہوئیں۔